Жануб маҳсулотлари саноқли кун­лардан кейин  бошланадиган халқаро кўргазма иштирокчиларига ҳам маъқул келиши аниқ. Сайрам туманида яшовчи Шавкат Ҳакимбоев “Астана ЭКСПО – 2017” кўргазмаси арафасида Астанага дастлабки ҳосилдан 4 тонна қулупнай жўнатди.  

“Зебо–1” деҳқон хўжалигининг 2 гек­тарида терим ишлари давом этмоқ­да. 40 одамни мавсумий иш билан таъминлаётган хўжалик раҳбари 13-14 тонна маҳсулот олишни мўлжаллаб турибди.

– Қулупнайимиз харидоргир, уни асо­сан Алмати ва Астана бозорларига юбор­моқ­дамиз. Маҳсулот йиғим-теримида қатнашаётган ҳар бир ишчига кунига 1700 тенгедан ҳақ тўлаяпмиз, – дейди суҳбат чоғида хўжалик раҳбари.

Далада етиштирилаётган қулупнайнинг “Виктория” нави мевасининг йириклиги ва ҳосилдорлиги билан ажралиб туради. Унинг бир килоси шу кунларда 350 тенгегача боради.

Бу нав ҳосили бир ой давомида йиғиб олинади. Уни суғориш алоҳида кўникма ва малака талаб қилади. 17 йилдан буён шу касбнинг бошини тутиб келаётган  Шавкат Аҳмадқул ўғли ерга алоҳида меҳр бериш кераклигини таъкидлайди. “Юқори ҳосил олиш учун биз ернинг унумдорлигини оширишга алоҳида эътибор қаратмоқдамиз. Қулупнай намликни яхши кўради, шунинг учун уни ўз вақтида суғориш – жуда муҳим. Ернинг сувни шимиб олиши учун органик ўғитни аямаяпмиз”, дейди у.  

75 метр узунликдаги эгатларнинг бо­шига бир машина маҳаллий ўғит тўкилган. Ерни юмшатиш ишлари мун­тазам амалга оширилади. Шундай қилинган тақдирдагина беш йил давомида бир жойда ўсадиган қулупнай кўнгилдагидек ҳосил беради. 

Сайрам туманининг Манкент қишлоқ округида 1200 деҳқон хўжалиги бор. Қишлоқда 100 гектарга яқин майдонда қулупнай етиштирилади.