“Жанубий Қозоғистон” вилоят ижтимоий-сиёсий газетаси таҳририятида республика, вилоят, туман, шаҳар этномаданият бирлашмалари ҳамда таълим соҳаси вакиллари, бир гуруҳ фаоллар иштирокида ўтган йиғилиш ўзбек тилини лотин ёзувига кўчириш масаласига бағишланди. 

Уни Қозоғистон ўзбек этномаданият бирлашмалари “Дўстлик” ҳамжамиятининг раиси И. Ҳошимжонов очиб, Элбоши Н. Назарбаев ташаббуси билан Қозоғистонда қозоқ тилини лотин графикасига асосланган алифбога кўчириш бўйича кенг қамровли ишлар олиб борилаётгани, ўзбек этноси вакиллари ҳам бу муҳим сиёсий ва тарихий жараёнда фаолллик кўрсатишлари зарурлигини эслатди. “Жанубий Қозоғистон” газетаси директор-бош муҳаррири А. Сотволдиев ушбу йиғилишнинг мақсади ҳақида гапириб, кўпчиликни қизиқтираётган масалада бир тўхтамга келиш фурсати етганини таъкидлади. 

– “Жанубий Қозоғистон” газетасининг 2018 йил 2 июнь сонида Кентов шаҳар ўзбек этномаданият бирлашмаси раиси Ҳ. Абдувалиевнинг “Бизнинг лотинчамиз қандай бўлади?” мақоласи, 26 сентябрда 

З. Мўминжоновнинг Жанубий Қозоғистон давлат педагогика университети чет эл талабаларини мослаштириш маркази раҳбари Ш. Норалиева билан “Лотинчамиз қандай бўлади?” мусоҳабаси, 8 декабрда эса Ҳ. Қўчқоров, Ф. Икромов, Ғ. Қирғизбоев, Қ. Тошхўжаевларнинг Мурожаати эълон қилиниб, улар кўпчиликда қизиқиш уйғотди, – деди у. 

Ш. Норалиева шу кунгача бажарилган ишларга тўхталиб, жорий йилда лотин графикаси асосида “Алифбо” китобини чиқариш режаланаётганини маълум қилди. Бунинг учун эса лотин ёзувига асосланган алифбо тасдиқланиши керак.

Муҳокамада сўз олган профессорлар Н. Алметов ва Б. Исмоилов, Тўлебий туман ўзбек этномаданият бирлашмаси раиси Ў. Қодиров, “Ижодкор” адабий бирлашмаси раиси А. Пратов, доцент Ё. Мадалиев, “Чашма” ижодий уюшмаси раиси 

С. Акромов, “Жанубий Қозоғистон” газетаси бош муҳаррирининг муовини И. Абдунабиев, меҳнат фахрийлари Ғ. Қирғизбоев, Қ. Тошхўжаевлар кун тартибидаги масала юзасидан ўз фикр-мулоҳазаларини билдиришди.

Таркиби И. Ҳошимжонов, А. Сотволдиев, Н. Алметов, Б. Турдиқулов, Ш. Норалиева, Ў. Қодиров, Ё. Мадалиев, А. Пратов, Ш. Алиакбарова, М. Мусаева, Н. Қўрғонбоева, Ҳ. Қўчқоров, И. Абдунабиевдан иборат махсус комиссия тузилиб, унинг зиммасига жорий йил март ойигача ўзбек тилининг лотин графикасига асосланган нусхаси лойиҳасини тайёрлаш топширилди.