Жанубий Қозоғистон вилояти ҳокими Жансейит Туймебаев “Ягона омонат нафақа жамғармаси” ҲЖ Бошқаруви раисаси Нурбиби Науризбаева билан учрашди.

Унда томонлар ўзаро ҳамкорлик ҳамда ижтимоий вазифаларни амалга оширишга йўналтирилган икки томонлама имкониятлар ҳақида суҳбатлашишди.

Шунингдек, учрашувда фуқароларнинг молиявий саводхонлигини ошириш ҳамда уларни жамғармавий нафақа тизимига жалб этиш ва нафақа тизимини янгилаш масалалари бўйича ахборот бериш мавзулари муҳокама этилди.

Учрашувлар натижасига кўра “Ягона омонат нафақа жамғармаси” ҳиссадорлик жамияти ҳамда Жанубий Қозоғистон вилоят ҳокимлиги ўртасида ҳамкорлик ва ўзаро ҳаракат меморандуми имзоланди.

Унинг доирасида аҳолининг жамғарма нафақа тизимига нисбатан молиявий саводхонликни ошириш, молия миқдорини кўпайтириш ҳамда тушадиган мажбурий нафақа бадалларининг барқарорлигини назорат қилиш, шунингдек, нафақа тизимини янгилаш бўйича ахборотлаштириш ишлари олиб борилади.

Ўз навбатида вилоят ҳокимлиги ЯОНЖнинг давлат ҳамда бошқа ташкилотларга ахборот беришга мўлжалланган тадбирларини ўтказишга ёрдам кўрсатади ва лозим бўлса, уларда иштирок этади.

Айтиш жоизки, бугунги кунда вилоят бўйича ўртача нафақа бадалининг миқдори 486 минг тенгени ташкил қилади. 2016 йили вилоят турғунларининг тўплаган ўртача аниқ мажбурий пенсия бадалларининг қиймати 6 478 тенге бўлди. Ҳозирги кунда республика бўйича ЯОНЖнинг 231та алоҳида хизмат кўрсатиш марказлари фаолият юритса, Жанубда 20та бўлим халққа хизмат кўрсатмоқда. Уларда ўтган йили 455,7 мингдан зиёд хизмат кўрсатилди.