Туркистон вилояти ҳокимининг ҳисобот йиғилишида ёш иштирокчилардан бири минтақа раҳбарига ўсмирлар ва ёшлар ўртасида футбол мусобақасини ўтказиш таклифини айтган эди. 

Ж. Туймебаев йиғин иштирокчилари олдида бу ташаббусни қўллашини ва мусобақанинг очилиш маросимига ташриф буюришини маълум қилганди. Ваъда бажарилди.

 Куни кеча Туркистон шаҳрида янги очилган “Ёшлар имконият маркази” спорт майдонида футболдан вилоят ҳокими соврини учун шаҳар чемпионати бошланди. Нуфузли беллашувда Туркистондаги кичик туманлар ва аҳоли манзилларидан 30та жамоа иштирок этяпти. Ҳовли клублари ўртасидаги беллашувнинг очилиш маросимида вилоят ҳокими Ж. Туймебаев шахсан иштирок этиб, иштирокчиларга муваффақият тилади.

– Ўсмирлар ва ёшлар спорт билан шуғулланиб, клубларга боришса, зарарли одатлардан йироқроқ бўлишади. Ҳовли клублари ўртасидаги ушбу чемпионат оммавий спортни ривожлантиришга таъсир кўрсатишига ишонаман, Туркистонда замон талабига мувофиқ спорт мажмуалари ва мактаблари ҳам кўпаяди, – деди минтақа раҳбари.

Мини футбол беллашуви бир неча ойгача давом этади. Туркистон шаҳрининг кичик “премьер-лигаси”га айланган деб ҳам атаяпти. Турнир ғолиблари ва совриндорларига, энг яхши ўйинчиларга қимматбаҳо совғалар топширилади. 

Келгусида Туркистонда спорт беллашувлари кўпаяди. Бу ўз навбатида ўсмирлар ўртасидаги ҳуқуқбузарликларни камайтиришига умид уйғотади.