Қозоғистон Республикаси Президенти, “Нур Отан” партияси Раиси Нурсултан Назарбаевнинг партия навбатдан ташқари XVIII съездида сўзлаган нутқи
Ҳурматли делегатлар ва съезд меҳмонлари!
Қадрли партиядошлар!
Барчангизни “Нур Отан” партиясининг 20 йиллик юбилейи билан чин қалбдан муборакбод этаман!
1999 йил 1 март мустақил элимизнинг йилномасига партиямизнинг тамал тоши қаланган кун сифатида кирди.
Тарих ўлчови билан қараганда, бу – кўп вақт эмас, бироқ биз учун яхлит даврга тенг.
Асрлар чорраҳасидаги мураккаб иқтисодий вазият зудлик билан тўғри йўлни танлаб олишимизни талаб қилди.
Мустақиллигимизни мустаҳкамлаб, бақувват давлат қуриш учун бизга дадил ва муҳим ислоҳотлар ўтказиш керак бўлди.
Акс ҳолда, тамаддун йўлига бошлайдиган дунёвий тараққиёт карвонидан қолиб кетар эдик.
Ана шундай буюк мақсадни кўзлаган “Нур Отан” партияси халқнинг ишончини оқлаб, муттасил олға силжишимизни таъминлайдиган бирдан бир сиёсий кучга айланди.
Синовли йилларда менга ёндош бўлиб, баланд чўққиларни забт этишда ҳисса қўшган партиядошларимга миннатдорчилик билдираман.
Мен бугун сизлар билан амалга оширган ишларимизни хулосалаб, келгуси йўналишимиз ҳақида фикрлашмоқчиман.
Даставвал эришган ютуқларимизни кўрсатадиган аниқ мисолларга тўхталиб ўтаман.
Мамлакатимизнинг иқтисодиёти бирмунча ўсди.
Ташқи савдо айланмаси ҳажми 9 баравардан зиёдга ортди. Қозоғистонга чет эллардан 320 миллиард долларга яқин бевосита сармоя тортилди.
Фуқароларимизнинг даромадини 16 баравар кўпайтирдик. 141 миллион квадрат метрдан кўпроқ уй-жой қурилди. Бутун мамлакактимизда улкан ижтимоий аҳамиятга эга янги инфратузилма иншоотлари бўй кўтарди.
1400та замонавий касалхона, поликлиника ва амбулатория, 2865та янги мактаб, коллеж ва болалар боғчаси очилди.
Буларнинг ҳаммаси – бутун халқимиз шижоатли меҳнатининг натижаси.
“Нур Отан” давлат аҳамиятига эга қарорлар қабулланишига таъсир кўрсатиб, сайловчиларнинг ишончини оқлаб келмоқда.
Қадрли партиядошлар!
Янги давр янги таҳдидларни юзага келтирмоқда. Атрофимиздаги олам танглик гирдобига тобора чуқурроқ чўкиб бормоқда. Лекин бу тушкунликка ва келажак олдида қўрқувга сабаб бўлолмайди.
Ҳар қандай бўҳронлар алғов-далғовлар билан бирга келади, шу билан бирга ўсиш учун кенгликни тозалаб, имкониятлар дарчасини очиб беради. Асосийси, ривожланишнинг тўғри йўналишини танлаб олиш ва бутун жамиятни қўйилган мақсадларга эришишга сафарбар этишдир.
Олға ҳаракатимизда биз ҳозирги оламнинг энг муҳим жиҳатларини инобатга олишимиз керак. Бугунги кунда давлатлар рақобати айрим одамларнинг рақобатига айланиб қолмоқда.
Агар ҳар бир кишининг ўсишига олиб бормаса, ҳар қандай иқтисодий муваффақият ҳамда геосиёсий ғалаба катта қиммат ва аҳамият касб этолмайди.
ХХI асрда давлатларни равнақ топтиришнинг асосий сири ва барқарор ривожлантириш формуласи ана шунда яширинган.
Бугун Съезд менинг топшириғим бўйича ишлаб чиқилган партиянинг 2030 йилгача бўлган “Фаровонлик жамияти: ўнйилликнинг 10 мақсади” дастурини кўриб чиқади. У навбатдаги ўн йилликда жамият ва давлатни ривожлантиришнинг стратегик мўлжали учун кенг уфқлар очиб, асосий йўналишларини белгилаб беради.
Сизларнинг дастурни муфассал муҳокама қилишингиз ва партия кун тартибини белгилаб беришингизга умид қиламан.
Бугунги Съезд Қозоғистоннинг ривожланишида янги босқични бошлаб беради. Олдиндаги 10 йил – бизнинг илғор давлатлар 30лиги сари ҳаракатимизда ҳал қилувчи даврдир. Шу муносабат билан партия ўзининг олдига аниқ мақсадлар қўйиши керак. Мен уларга батафсил тўхталиб ўтирмайман, уларнинг ҳаммаси Дастурда кўрсатилган.
Аминманки, ҳар биримиз янада кучлироқ ва гуллаб-яшнаган Қозоғистоннинг қарор топишига ўзимизнинг муносиб ҳиссамизни қўшамиз.
Ўз фаолиятимизда биз миллий ғоямизга амал қилмоғимиз лозим. Унинг асосий таркиблари:
миллий бирлик;
рақобатбардош қудратли иқтисодиёт;
заковатли равнақ топган жамият;
жаҳонда ҳурматга сазовор мамлакат ҳисобланади.
Буларнинг ҳаммаси Қозоғистонни муваффақиятли ривожлантириш гаровидир.
Ўз навбатида Миллий бирлик доктринаси тўртта устунга таянади:
умумий тарих;
умумий қадриятлар;
умумий Ватан;
умумий келажак.
Ҳурматли сафдошлар!
Истиқбол кетидан қувиб, биз ҳозирги вазифаларни унутиб қўймаслигимиз керак. Бизнинг бош йўналишимиз – фуқароларнинг турмуш даражасини ва ижтимоий соҳага йўналтирилган давлат сифатида Қозоғистоннинг ривожланишини таъминлашдан иборат.
Биз ҳатто энг машаққатли даврларда ҳам ўзимизнинг ижтимоий мажбуриятларимизни бажариб келдик. Мамлакатда ижтимоий харажатлар даражаси ҳамиша юқори бўлди, келгусида ҳам у изчил ўсиб боради.
Турли дастурлар, лойиҳалар ва ташаббуслар доирасида биз кўламдор ижтимоий сармояларни амалга оширамиз. Биз тараққиётга харажатларни камайтирмаган ҳолда муҳтожларга ёрдам беришимиз керак.
Жорий йилда республика бюджети барча харажатларининг 45 фоизи ижтимоий соҳага йўналтирилди.
Ҳолбуки, ижтимоий соҳада муайян номутаносиблик ва қатор муаммоли нуқталар аён бўлиб қолди.
Шу муносабат билан мен учун фуқароларимизнинг турмуш сифати ва фаровонлигини ошириш учун Миллий жамғармадан маблағ ажратиш ҳақида қарор қабул қилдим.
Ҳукумат ана шу мақсадларга ажратилган харажатларни тўғри идора қилмоғи лозим.
Шу билан бирга, биз дунёвий катта таҳдид ва ноаниқлик шароитларида яшаётганимизни ҳам ёдда тутишимиз керак. Тўплаган захираларимиз бунданда қийинроқ даврларда асқотиб қолиши мумкин.
Ижтимоий сиёсат мувозанатлашган бўлиши ва боқимандалик кайфиятларининг кучайишига сабаб бўлмаслиги зарур.
Давлатнинг бош вазифаси – одамларга иш бериш, токи, улар яшаш учун ўзлари пул топишсин.
Ёрдам ўта муҳтожларга берилиши ва қатъий манзилли тавсифга эга бўлиши керак.
Ажратилаётган ёрдамнинг ҳаммаси ҳар бир оила ва аниқ одамга етиб боришини шахсан ўзим назорат қилиб тураман!
Менинг топшириғимга кўра, партия бугун фуқароларимизни кўпроқ ташвишлантираётган муаммоларни таҳлил қилиб чиқди.
Улар орасида – болалар нафақаларини ошириш, кўп болали оилалар аҳволини яхшилаш, уй-жой билан таъминлаш, ижтимоий инфратузилмани модернизациялаш ва бошқа масалалар мавжуд.
Ижтимоий сиёсатни уч йўналишда амалга ошириш партиянинг уларни ҳал этишдаги салмоқли ҳиссаси бўлади.
Булар:
- даромадни ошириш ва аҳоли кам таъминланган қатламларининг даромадини ошириш ва уларни қўллаб-қувватлаш;
- кам даромадли фуқароларнинг уй-жой масалаларини ҳал қилиш таълим ва соғликни сақлаш соҳаларини яхшилаш;
- минтақаларни мажмуавий ривожлантириш.
БИРИНЧИ. Бугун Қозоғистонлик оилаларнинг фаровонлик даражасини ошириш чораларини кучайтириш муҳимдир.
Улар соғликни сақлаш, таълим, ижтимоий муҳофаза, маданият, спорт, қишлоқ хўжалиги ва бошқа соҳаларда банд бўлган 1 миллиондан зиёд фуқаровий хизматчиларга бевосита таъсир кўрсатади.
2019 йил 1 июлдан:
- бюджет соҳасидаги кам ойлик оладиган ходимларнинг маошини 30 фоизга ошириш;
- туман ва вилоят даражасида фуқаролар билан бевосита ишловчи ижро органлари қуйи бўғиндаги ходимларининг маошини ўрта ҳисобда 25 фоизга кўтаришни топшираман.
Ана шу мақсадларга 2019-2021 йилларда қўшимча 980 миллиард тенге ажратилади.
Фуқароларнинг кам таъминланган тоифалари ва кўп болали оилаларга жиддий эътибор қаратиш лозим.
Қозоғистондаги ҳар бир оила ўтказилаётган ислоҳотлар натижасини олис келажакда эмас, бугун сезиши керак.
Айниқса, кўп болали оилаларимизни қўллаб-қувватлаш чораларини кучайтиришни зарур деб ҳисоблайман.
Бугун мамлакатда 340 мингдан зиёд оиланинг 4дан кўп боласи бор.
Йил сайин кўп болали оилаларни қўллаб-қувватлашга 500 миллиард тенгедан кўпроқ ажратилмоқда.
Бу оилаларнинг даромад даражаси ҳам турлича.
Шунинг учун, давлат биринчи навбатда, кам даромадли серфарзанд оилаларга алоҳида ғамхўрлик ва эътибор кўрсатмоғи даркор.
Ҳозирги пайтда 111 миндан кўпроқ оила (571,6 минг киши) давлатдан манзилли ижтимоий ёрдам олади.
Ҳукуматга, кам таъминланган, айниқса, кўп болали оилалар қамровини кенгайтириш учун, манзилли ёрдам кўрсатиш мезонини яшаш минимумининг 70 фоизигача (14849 тенгедан 20789 тенгега, ЯМ – 29698 тенге) оширишни топшираман.
Манзилли ижтимоий ёрдам олиш ҳуқуқига эга болали оилаларни манзилли қўллаб-қувватлаш учун кўп болали оилалардаги ҳар бир болага 20789 тенге миқдорида энг кам тўлов белгилансин.
Ижтимоий ёрдамни тайинлаш тартибларининг ҳаммаси имкон қадар соддалаштирилиши ва фаоллаштирилган шаклга ўтказилиши даркор.
Бундай оилаларнинг умумий даромадини ҳисоблаш чоғида кўп болали оилалар ва серфарзанд оналарга бериладиган давлат нафақалари, болаларга ногиронлик учун бериладагин нафақалар, стипендиялар сингари алоҳида нафақалар ҳисобдан чиқариб ташлансин.
Натижада, 2019 йилда манзилли ижтимоий ёрдам билан 830 мингдан зиёд киши, шу жумладан, деярли 550 минг бола қамраб олинади.
Шунингдек, ногирон болаларни тарбиялаётган ота-оналар, васийлар, оилалар (шахслар) нафақасини 30 фоизга оширишни топшираман.
Бу 100 мингдан зиёд одамни қамрайди.
Ушбу чораларни амалга ошириш учун 2019-2021 йилларга қўшимча 300 миллиард тенгедан кўпроқ ажратишни топшираман.
Ижтимоий ёрдам кўрсатишнинг асосий тамойили ижтимоий шартнома ва оила меҳнатга лаёқатли аъзоларининг бандлик тадбирларида мажбурий иштироки бўлиб қолаверади.
Шунингдек, ҳокимларга ҳар бир оилага етиб боришни, ҳудудий имкониятлардан келиб чиққан ҳолда, маҳаллий бюджет маблағи ҳисобидан муҳтожларга ёрдам чораларини кучайтиришни топшираман.
Фақат ўтган йилнинг ўзида жойларда бундай ёрдам 135 миллиард тенгедан зиёд миқдорда кўрсатилган эди.
Бундай қўлловни бундан буён ҳам кўрсатиш керак.
Иккинчи даражали ишларга сарф-харажатни кўпайтирмаган маъқул.
Тўла бўлмаган кўп болали оилаларга уйда ишлаш учун шароит яратиш, қишлоқдаги кўп болали оилалар учун эса грант ва кичик насия квоталарини ажаратиш мантиққа тўғри келади-ку!
Ҳукумат ва ҳокимлар бу фаолиятни “Нұр Отан” партияси ва “Атамекен” МТП билан биргаликда амалга оширишлари лозим.
Ҳокимлар “Бақытты отбасы” (“Бахтли оила”) партиявий лойиҳасини ҳисобга олган ҳолда муҳтож оилаларга ёрдам кўрсатиш минтақавий дастурларини қайта кўриб чиқишлари зарур.
У Қозоғистонда оила институтини изчил қўллаб-қувватлашга йўналтирилган.
Иккинчи. Уй-жой билан таъминлаш ва таълим ҳамда соғликни сақлаш соҳаларини яхшилашга доир ишни фаоллаштириш даркор.
Ҳукуматга “Нурли ер” дастури доирасида асосан, кам таъминланган кўп болали оилалар учун 40 мингдан зиёд ижаравий квартиралар қуришни топшираман.
Бу мақсадларга яқин етти йил ичида ҳар йили қўшимча 50 миллиард тенгедан ажратилиши даркор.
Шунингдек, кам даромадга эга кўп болали ва тўла бўлмаган, имконияти чекланган фарзандлари бор оилалар учун уй-жой харид қилиш имкониятини кенгайтириш зарур.
Бундай тоифадаги фуқаролар учун уй-жой қурилиш омонатлари тизими орқали йиллик 2-3 фоиз устама билан уй-жой учун қарзлар бериш имтиёзли механизмини ишлаб чиқишни топшираман.
Ана шу мақсадлар учун “Жилстройсбербанк”ка йилига 50 миллиард тенгедан ажратиладиган бўлади.
Таълим соҳасидаги ислоҳотларни мантиқий натижаларга етказиш лозим.
Ҳозирги воқелик болаларимизда янги кўникма ва малакаларни ривожлантиришни тақозо этмоқда.
Бу ерда муваффақият гарови – педагогларнинг малакасини мунтазам ошириш, илғор моддий база ва ўқитишнинг долзарб дастурларидир.
Мен илгари ҳам топширганимдек, ҳар бир минтақада кам деганда 1та илғор ОЎЮ ва 10та замонавий коллеж фаолият юритиши керак.
Ўқув даргоҳлари самарадорлигининг бош мезони бу – битирувчиларнинг иш билан таъминланиши бўлмоғи лозим.
Мамлакатимизнинг ҳар бир фуқароси нафақат билимли, шунингдек, соғлом ҳам бўлиши керак.
Яшаш жойидан қатъиназар, сифатли соғликни сақлаш имконияти таъминланиши зарур.
Мамлакат тиббиёти, энг аввало, профилактика ҳамда соғлом турмуш тарзини рағбатлантиришга йўналтирилиши лозим.
Ижтимоий соғликни сақлаш хизмати ва дастлабки тиббий-санитария ёрдамига бўлинадиган харажатлар соғликни сақлашни молиялаштириш умумий ҳажмининг 40 фоизидан 60 фоизигача кўпайтирилиши керак.
Бу – дунёдаги барча ривожланган давлатларнинг тажрибаси. Соғликни сақлаш соҳасини ривожлантиришга қўшимча 120 миллиард тенге ажратишни топшираман. Натижада, 7та минтақада йилига 100 минг кишига стационар тиббий ёрдам кўрсатиш имконияти ва хизмат кўрсатиш сифати ошади.
УЧИНЧИ. Бутун мамлакатда турмуш сифатини яхшилашга йўналтирилган минтақавий сиёсатни амалга оширишни бошлаш керак. Бизда ҳали ҳам минтақаларни ривожлантиришда “тафовутлар” сезилмоқда.
Нима учун бир вилоятда йўллар яхши, бошқасида эса ёмон? Нима учун қаердадир уй-жой коммунал хўжаликлари барқарор ишламоқда, баъзи жойларда оқсамоқда?
Демак, баъзи ҳокимлар чинакамига ишламоқда, одамларнинг муаммоларини биладилар ва ҳал қилмоқдалар. Бинобарин шундайлари ҳам борки, минтақадаги аҳолининг ҳақиқий эҳтиёж ва талабларини писанд қилмайдилар, аҳоли билан мулоқотдан қочадилар. Ҳокимлар ҳалққа яқин бўлишлари ва уларнинг фаровонлиги учун барча имкониятлардан фойдаланишлари зарур.
Бизда турли дастурлар бор, етарли маблағ ажратилмоқда, лекин одамлар аниқ натижаларни кўришмаяпти. Бундай ишлашга йўл қўйиб бўлмайди.
Ҳукумат ва барча даражадаги ҳокимлар кўрсаткичларнинг орқасидан қувмай, популизмга берилмай, ижтимоий муаммоларнинг ҳаммасини амалда ҳал этишлари лозим. Ҳар бир минтақа стратегик аҳамиятга эга. Биз турмуш сифатининг янгиланган минтақавий андазаларига асосланган мамлакатнинг Янги харитасини ишлаб чиқишимиз зарур.
Кейинги йилларда республика автотранспорт шохобчаларининг қурилиши борасида улкан тарихий муҳим иш ўтказилди. Умуман олганда, биз 12,5 минг километрдан кўпроқ автомобиль ва 2,5 минг километр темир йўллар ҳамда денгиз портларини қурдик ва таъмирладик. Қурилган катта йўллар муҳим, бироқ уйгача олиб борадиган йўл унданда муҳимроқ. Замонавий маҳаллий йўллар шохобчаларини кенгайтириш – Ҳукуматнинг долзарб вазифаси, унинг бажарилишини партия назорат қилиб туриши керак. Ана шу мақсадларга қўшимча 350 миллиард тенге ажратишни топшираман.
Ушбу чоралар 2025 йилга бориб вилоят ва туман аҳамиятига эга автойўллардан 95 фоизининг ҳолатини яхшилашга имкон беради. Минтақавий транспорт инфратузилмасининг барча объектлари, шу жумладан, аэропортлар, авто ва темирйўл вокзаллари янгиланган бўлиши керак.
Йирик шаҳарлар – Астана, Алмати ва Шимкент теварагидаги муаммоларни ҳал этиш учун 2019-2021 йилларда қўшимча 90 миллиард тенге ажратилади.
Кичик ва моношаҳарларни ривожлантиришга ҳам яқин уч йил ичида йил сайин қўшимча 10 миллиард тенгедан бўлинади.
Мамлакат бутун аҳолисининг тоза ичимли сувга эга бўлиши ва кенг миқёсли газлаштиришнинг ўтказилиши муҳим йўналишлардан ҳисобланади. Сув таъминоти ва сув чиқарилишини таъминлашга қўшимча 140 миллиард тенге ажратишни топшираман. У мазкур соҳада 2 миллиондан кўпроқ кишининг муаммосини ҳал этишга имкон беради. Шунингдек, газлаштириш ва электр таъминотига қўшимча 190 миллиард тенгега яқин маблағ ажратишни топшираман. Мазкур чоралар 1,1 миллион кишини газ билан таъминлашга, шу билан бирга минтақавий электр таъминотининг ишончлилигини анча оширишга кўмаклашади.
Ҳукуматга шу мақсадларга 2019-2021 йиллар учун 920 миллиард тенге атрофида маблағ кўзлашни топшираман.
Юқорида айтилганларни ҳисобга олган ҳолда, “Нур Отан” мамлакат муҳандислик ва ижтимоий инфратузилмасини ривожлантиришга қаратилган “Қутлуғ макон” партиявий лойиҳасини татбиқ этиши лозим.
Бизда қишлоқда яшовчи 7,5 миллион аҳолининг турмушини яхшилаш имкониятлари бор.
Биринчи навбатда, Ҳукумат ҳокимлар ва маслаҳатлар билан бирга истиқболга эга қишлоқларни танлаб олиши ва шу жойларда ижтимоий соҳани ривожлантириши, интернатлар барпо этиши лозим. Биз қишлоқларимизни ўсиш ва барқарор ривожланиш нуқталарига айлантиришимиз керак.
ХХРнинг қишлоқда халқ истеъмол товарлари ишлаб чиқариш, қишлоқ хўжалиги маҳсулотларини қайта ишлаш ва бошқа соҳалардаги бизнесни ривожлантириш борасидаги тажрибасини қабул қилиш зарур. Бу жойларда уй-жой барпо этиш, йўллар, коммуникациялар, ижтимоий иншоотлар қуриш, кичик ва ўрта бизнесни ривожлантириш даркор.
Ана шунда келажаги йўқ қишлоқлар аҳолиси шу ерга интилади. Қишлоқда ишлаб, пул топиш ва муносиб ҳаёт кечириш имконияти мавжуд. Шу муносабат билан Ҳукуматга “Қишлоқ – Эл бешиги” махсус лойиҳасини амалга ошириш юзасидан таклифлар ишлаб чиқиш ҳамда 2019-2021 йилларда уни 90 миллиард тенге миқдоридаги маблағ билан таъминлашни топшираман. Бу қишлоқда ёшларни ушлаб қолишга ёрдам беради.
Юқорида таъкидланган барча йўналишлар ва лойиҳалар мажмуавий тавсифга эга, партиянинг узоқ муддатли мақсадлари билан боғланган ва ҳадемай одамларга сезиларли фойда келтиради.
Уларни амалга ошириш учун яқин уч йил ичида бюджетдан қўшимча равишда 2 триллион тенгедан кўпроқ ажратилади.
Ушбу маблағ божхонадаги расмийлаштириш ишларини тубдан яхшилаш ва бюджет харажатларини мақбуллаштириш эвазига топилиши керак. Бунда жойлардаги муҳим бўлмаган, қимматга тушадиган тадбирларнинг молиялаштирилишига барҳам бермоқ лозим.
Мазкур чоралар яқин уч йил ичида бюджетга 1 триллион тенге киритиш имконини беради.
Шунингдек, 2019-2021 йиллар мобайнида Миллий жамғармадан қўшимча 1 триллион 350 миллиард тенге ажратилиши керак.
Менинг топшириғимга кўра, партиянинг янги дастури муҳим жаҳон трендларини ва Қозоғистоннинг барча минтақаларидаги вазиятни таҳлил қилиш негизида ишлаб чиқилди. Унда аниқ мақсадлар ва лойиҳалар белгилаб берилган, улар яқин уч йилга мўлжалланган давлат ижтимоий сиёсатининг пойдевори бўлиши ва бутун ўнйиллик учун истиқболни белгилаб бериши керак.
Ўзингиз биласиз, бизда Ҳукумат алмаштирилди, унинг таркиби 70 фоизга янгиланди. Янги Вазирлар маҳкамаси, барча ҳокимлар мен айтган топшириқларни амалга оширишга зудлик билан киришишлари лозим.
Ҳукуматнинг ҳар бир аъзоси ва ҳокимлар ишнинг натижаси учун шахсий жавобгарликни ҳис этишлари керак ва шахсан жавоб берадилар.
Ҳурматли съезд делегатлари!
Партия аҳолининг кундалик муаммоларини ҳал этишга фаол киришиши керак. “Халққа ёрдам” лойиҳаси мазкур ишни кучайтириши даркор. Бугун жамиятнинг долзарб талаб-истакларига тезкорлик билан эътибор қаратиш, давлат органларининг диққатини уларга йўналтириш муҳимдир. Бу энг таъсирчан стратегиядир.
Бунинг учун аҳоли билан жипс алоқанинг қудратли тизимини шакллантириш лозим. Партия жамоат қабулхоналари ишини кучайтириш муҳимдир. Аслида, улар “шу ерда ва ҳозир” тамойилига кўра фуқароларимизга ёрдам кўрсатишнинг “ягона дарчаси” бўлишлари шарт. Бу масалада расмий тўғаноқлар бўлмаслиги даркор.
Бу нафақат давлат имтиёзлари, шунингдек, кўнгиллилар ҳамда тадбиркор-ҳомийлар томонидан кўрсатиладиган манзилли ёрдамга ҳам тааллуқли бўлиши керак.
“Нур Отан”нинг барча филиаллари биринчи галда ана шу ишга йўналтирилиши лозим.
Партия аҳоли барча қатламларининг манфаатларини ифодалаши ва фуқаролар билан давлат ўртасидаги муҳим боғловчи бўғин сифатида чиқиши даркор.
Бугун амалдаги давлат дастурлари, шу жумладан, ижтимоий соҳалардаги ҳам, самарадорлиги масалалари биринчи ўринга чиқмоқда.
Шу муносабат билан “Нур Отан”га Президент Маъмурияти билан биргаликда Давлат дастурлари ва ислоҳотларини амалга ошириш самарадорлигини баҳолаш ва мониторинг марказини ташкил этишни топшираман.
Чорак сайин партия майдончасида масъул давлат органларининг давлат дастурларининг бажарилиши ҳақидаги ҳисоботларини тинглашни йўлга қўйиш жоиз.
Ҳисоботлар ўзимга топширилади.
Улар асосида тегишли хулосалар чиқарамиз.
Умуман олганда, яна бир марта таъкидламоқчиман: иқтисодий ривожланиш аҳолининг чинакам фаровонлигини ўстиришга йўналтирилган бўлиши лозим.
“Нур Отан” “Атамекен” тадбиркорлар палатаси билан биргаликда бизнесни давлат томонидан қўллаш тамойилларини яхшилаш устида ишлаши зарур.
Коррупциянинг илдизини қуритиш юзасидан мақсадга мувофиқ ишни давом эттириш керак.
Ёшлар алоҳида диққат марказида бўлишлари зарур, чунки келажак уларнинг қўлида!
Бу йилни мен Ёшлар йили деб эълон қилдим.
Партия давлат ёшлар сиёсати самарадорлигини оширишга эришмоғи даркор.
Партия фаол фуқаролар учун муҳим “ижтимоий лифт”лардан бири ҳамда барча даражадаги давлат бошқарув тизими учун кадрлар манбаи бўлиб қолиши шарт.
Замонавий бошқарувчиларнинг янги оқими “Партия ёшлар захираси”дан вужудга келиши зарур.
Барча нуротанликлар чинакам ватанпарвар бўлишлари ва нуфуз-эътибор қозонишлари керак.
Партиянинг аҳоли ўртасидаги обрўси марказдаги кўламдор акциялар ёки тадбирлар билан вужудга келмайди.
Оддий қозоғистонликлар нигоҳида партиянинг тимсоли унинг жойлардаги кундалик ишида намоён бўлади.
Бошланғич партия ташкилотлари кенг миқёсли масалаларни ҳал этишда муҳим бўғин бўлмоғи даркор.
Партиявий тадбирлар мазмундорлиги устида айниқса, минтақаларда, ишлаш лозим.
Биз халқ билан ҳаққоний ва очиқча мулоқот олиб боришимиз ва турмуш сифатини яхшилаш учун барча имкониятларни ишга солишимиз керак.
Бундай кўламдор вазифаларни ҳал этиш партиядан чинакам фидойилик ва ишга масъулият билан ёндашишни тақозо этади.
“Нур Отан” ижтимоий назоратнинг асосий институтига айланиши лозим.
Мен бугун тилга олган таклифларимнинг ҳаммаси партия Дастурида инобатга олиниши керак.
Ҳурматли ҳамкасблар!
“Нур Отан” – тўкис муваффақият ва келажакка йўл очиб берадиган ёрқин зафарлар партияси.
Бизнинг узоқ муддатли стратегиямиз, мўл табиий захирамиз, сиёсий куч-ғайратимиз бор.
Давлатнинг қудрати иқтисодиётнинг ривожланиш суръати ҳамда фуқароларнинг турмуш сифати билан ўлчанади.
Шунинг учун мен ўзимга ишонч билдирган халқимнинг келажакда эмас, ҳозир бахтли бўлганини кўргим келади.
Бизнинг қоидамиз – тотувлик ва тинчлик, шиоримиз – барака ва бирлик.
Мустақил Қозоғистоннинг таянчи – умрбоқий тинчлик ва тотувлик!
Бош партия бўлиш деганимиз – бошқариш эмас, элга ҳалол хизмат қилиш!
Биз – халқ бирлиги партиясимиз.
Бугунги съезд Қозоғистонни ривожлантиришнинг янги даврига йўл очади.
Мамлакат мустақиллигининг 30 йиллигига бағримиз бутун, омон-эсон, улкан ютуқлар билан етайлик!
Ҳаракат қиладиган вақт келди, биродар!
Олға, “Нур Отан”!
Олға, Қозоғистон!