Албатта, инсон ҳаётини ёритиш учун катта қаламкаш бўлиш шартмас. Аммо ёзгинг келган нарсаларни баъзида тилга чиқара олмайдиган онларим ҳам бўлади. Чунки она меҳрига тўймай, бир маротаба бўлса ҳам тушимга киришларини армон қилиб ўтаётган мен учун оналар ҳақида ёзиш бироз мушкулроқ.
Аммо мақолам қаҳрамони тимсолида барча меҳнаткаш, фидойи оналар кўз олдимда гавдаланади.
“Оналар бор, болам дейди, уйим дер,
Оналар бор, нур сочилар юзидан,
Оналар бор, фарзандини қучганлар,
Оналар бор, сабр қилиб юрганлар,
Оналар бор, шукр, дейди борига,
Оналар бор ўзбегимнинг юзидир,
Оналар бор бахтимизнинг кўзидир,
Оналар бор, узоқ ёнар чироқдир”.
Шоирнинг ушбу таърифларини ўзида мужассам этган, чеҳраси кулиб турган Маълумой Шамшиметова хонадонига кириб борарканман, менга очиқ чеҳра билан пешвоз чиққан онахон бағрига сингиб кетгандек бўлдим.
– Маълумой ая, бундай исмни биринчи марта эшитиб турибман. Келинг, аввало, ўзингиз ҳақингизда гапириб беринг.
– Раҳматли ота-онам Аҳмадхўжа ва Гулжамол 14 фарзанд кўрган эканлар. Минг афсуски, уларнинг 11 нафари болалигида чечак, қизамиқ хасталикларидан оламдан ўтишган экан. Мен эса дояликдан озми-кўпми хабари бор қўшни аёл қўлида туғилган эканман. Шу аёлнинг ўзи “менинг доялигим мана энди маълум бўлди”, деб менга Маълумой деб исм қўйган экан. Бундан анча йиллар муқаддам Тошкентда яшайдиган яна бир укамдан айрилиб қолдим. Ҳозир Эргаш деган иним бор.
– Онажон, хонадонга тўнғич келин бўлиб тушган экансиз...
– Тўғри, фарзандларимнинг отаси билан мактабда бирга ўқидик, турмуш қурдик. 9 болали оилага катта келин бўлиб тушдим. Қайнонамга тортиб, мен ҳам 9 нафар фарзанд кўрдим. Қайнотам ва қайнонам жуда яхши инсонлар эди. Далада ишладим. Хамир қориб кетаман. Тушликда келиб нон ёпаман, кечга моллар учун даладан ўт олиб қайтамиз. Болаларимизга ойим раҳматли бош-қош бўлардилар. Турмушнинг борига ҳам, торига ҳам сабр қилганлар кам бўлмайди. Алоҳида уй бўлиб чиқдик. Ўғил-қизларимиз вояга етиб, қанотимизга киришди. Кейинчалик уйимиз яқинидаги “Бакалейторг” корхонасига фаррош бўлиб ишга кирдим. Шу ердан фахрий ҳордиққа чиқдим.
– Ая, уч қизингизни узатиб, 6 ўғилни уйлантирибсиз, бугунги кунда улар ардоғида экансиз. Бу кунларга етиш осон бўлмагандир?
– Албатта, тўққиз фарзандни вояга етказиш осон иш эмас. Ўзим босиб ўтган умр китобини бирма-бир варақласам, нимагаки эришган бўлсак, ҳаммасига оилавий турмушимиздаги ўзаро тотувлик, ҳамжиҳатлик, меҳнатсеварлик ва ишонч сабаб. Турмуш ўртоғим жуда меҳрибон, меҳнаткаш инсон эдилар. Ўғилларим – Ваҳоббой, Баҳодир, Лутфулла, Абдулла, Хайрулла, Ғайбулла ота изидан боришди. Барчаси турли корхоналарда ҳайдовчилик қилишади. Қизларим – Замира (ҳамшира)Тошкентда яшайди. Гулмира ва Мунира ҳам ажойиб оила соҳибалари. Бизнинг оилани кўплар “ҳайдовчилар сулоласи”, дейишади. Илойим, ортимда қолишсин.
– Келин танлашда адашмадингизми?
– Йўғе, келинларим менинг қизларим. Шоҳсанам, Карима, Муҳайё, Нилуфар, Гулноза, Манзура шу кунгача бир гапимни икки қилишмаган. Кам бўлмасинлар. Мени ёш боладек парваришлаб, ҳурмат қилишади. Уларга муносиб тарбия берган қудаларимга минг раҳмат! Вақтида уч келин қўлимда турди. Иморат солиб, бирини чиқардик. Янги келин олаётганда иккинчи келиним катта овсини билан яшаб турди. Ана шундай қилиб, навбатма-навбат янги уйлар қуриб, ҳаммаси “ватанли” бўлди. Фарзандларимнинг оилалари йилдан-йилга мустаҳкамланиб, 32 невара, 38 нафар эвара ҳаётимнинг мазмун-моҳиятига айланди. Бир афсусланарлиси, бувалари дунёни эрта тарк этди-да. Ҳар тонг Яратганга шукрона келтираман, Аллоҳдан юртнинг тинчлигини сўрайман.
– Аяжон, машаққатли меҳнатдан бош тортмай, уйим-жойим деб, ўзингизни ўтга-чўққа урдингиз, мана бугун роҳат-фароғатда умргузаронлик қиляпсиз. Менимча, ҳозирги ёшларимиз турмушга жуда енгил қарашаётгандек. Сиз бунга нима дейсиз?
– Фикрингизга қўшиламан. Фарзандларнинг сабр-қаноатли, меҳр-муҳаббатли бўлишига, энг аввало, ота-она сабабчи. Ҳозирги ёшлар оилада тезроқ бошқарув тизгинини ўз қўлига олгиси келади, мустақил, ҳеч кимнинг назоратисиз яшашни исташади. Шунинг учун бўлса керак, турмушлари тез бузилиб, бегуноҳ фарзандлари жабр кўришяпти. Сабр – энг яхши фазилат. Яратгандан сабр-қаноат сўрасак, ҳаммаси биз истагандек бўлади.
Маълумой ая бугунги ҳур замонга шукроналар айтиб, фарзандларини дуо қилишга одатланган. Бир-бирларига ғанимат бўлиб бораётган қариндош-уруғлари, қўни-қўшнилари, маҳалладошлари билан бот-бот учрашиб, тўкин-сочин, тинч-фаровон, хотиржам ҳаётидан мамнун эканлигини қайта-қайта такрорлаб, Элбошимиз Нурсултан Назарбаевга узоқ умр тилайди.
Эҳ, соддагина, хокисоргина онажон! Қалбингиз бунчалар беғубор! Илоҳим, қалбингиздаги меҳр-оқибат манзилингизни нурли, толеингизни саодатли қилсин. Умрингиз мазмунли, ибратли ўтаётганига гувоҳ бўлдим. Сизни ардоқлаб, ширин каломию хуштаъм таоми билан кўнглингизни тоғдек юксалтираётган Манзура келинингизга ҳавасим келди. У ҳам ўғлингиз Ғайбулла билан қўша қариб, Самандар, Искандар, Ҳабибулла, Муҳаббат, Марямнинг бахтусаодатини кўришсин. Фарзандлар, невара ва эваралар ардоғида омонат ва ғанимат кексалик гаштини суриш барчамизга насиб этсин!
Тасвирда: Маълумой ая набиралари билан.