Элбоши раислигида ижтимоий сиёсатни амалга ошириш масалалари бўйича йиғилиш ўтди

Мажлисда Бош вазир А. Мамин, Президент Маъмурияти раҳбари А. Исекешов ҳамда Бош вазир ўринбосари Г. Абдихалиқова иштирок этдилар.

Унда Нурсултан Назарбаев қозоғистонликлар турмуш шароитини яхшилаш ва фаровонлигини оширишга йўналтирилган тадбирларнинг  сифатли бажарилиши муҳимлигини таъкидлади.

Йиғилиш давомида Элбошига Ҳукуматга топширилган вазифаларни бажариш режаси ҳамда ижтимоий сиёсатнинг қонун доирасида амалга оширилиши тўғрисида ахборот берилди.

Иштирокчилар маърузаларини тинглаб, Давлат раҳбари аҳолининг барча муҳтож тоифаларига ижтимоий қўллов кўрсатиш зарурлигини таъкидлади.

Элбоши аҳолининг кам таъминланган қатлами, шунингдек, кўп болали оилалар яқин кунларда давлат ғамхўрлигини ҳис қилишлари кераклигини айтди.

Қозоғистон Президенти иқтисодий сиёсат самарадорлигини ошириш ҳамда бу жараёнда аҳолининг фаол иштирокини таъминлаш зарурлигини ҳам уқтирди.

– Биринчи навбатда фуқароларни иш билан таъминлаш керак. Давлат девонининг вазифаси – кичик ва ўрта бизнесни кучайтириш ҳамда янги иш ўринларини яратишдан иборат.

Бу ишни ҳамма жойда барча шаҳар, туман ва қишлоқларда бажаришимиз керак, – деди Элбоши.

Давлат раҳбари мажлис сўнгида Президент Маъмуриятига “Нур Отан” партияси билан биргаликда топширилган вазифаларнинг ижроси устидан доимий назорат ўрнатишни  топширди.