ҚР Меҳнат ва аҳолини ижтимоий муҳофазалаш вазири Бердибек Сапарбаев Астанада ўтган кўп болали оналар билан учрашув чоғида жорий йилнинг 1 июлидан бюджет соҳасидаги қайси ходимларнинг маоши оширилишини маълум қилди.

– Давлат раҳбарининг топшириғига кўра 2019 йилнинг 1 июлидан бюджет соҳасида ишлайдиган айрим ходимларнинг маоши 30 фоизга ошади. Оширилган миқдордаги маошни 1дан 8гача тоифали, ёрдамчи (техник) ва маъмурий йўналишдаги ходимлар, шунингдек, мансаблар ўртасида тоифалараро оралиқ тафовут сақлаш учун бошқарув йўналишидаги баъзи ходимлар олишади, – маълум қилди вазир.

Б. Сапарбаевнинг айтишича, бу соғликни сақлаш, таълим, ижтимоий муҳофаза, маданият, спорт, қишлоқ хўжалиги ва бошқа соҳаларда банд 1 миллиондан зиёд ходимларга дахлдор. Уларнинг ойлик маошлари иш стажига қараб оширилади.

– Бундан ташқари 2019 йил 1 июлдан туман ва вилоят миқёсида фуқаролар билан бевосита ишлаётган ижро органлари қуйи тоифа ходимларининг маоши ҳам ошади. Қарийб 78 минг давлат хизматчисининг иш ҳақи кўпаяди. Маошларнинг ўртача ўсими 25 фоизни ташкил этади, – деди вазир.

Вазирнинг айтишича, Ҳукумат захираси ҳисобидан зарур маблағ республика бюджетида кўзланган.

Таъкидлаш жоизки, айни дамда вазирлик барча давлат органлари ва минтақалар бўйича ҳисоб-китоблар юритяпти. Белгиланган муддатда қарор қабул қилинади.