Улуснинг улуғ куни – Наврўзи олам Сайрам тумани маркази – Оқсувкент қишлоғидаги марказий истироҳат боғида ҳам нишонланди. 

Кўкламнинг чор-атроф яшилликка бурканган илиқ ва роҳатбахш кунларида ўтаётган ёшариш, янгиланиш айёмига барча қишлоқ округларидан фаоллар, этномаданият бирлашмалари вакиллари, ўқувчилар, талабалар ва бошқа меҳмонлар ташриф буюришди. Тадбир Наврўзни мадҳ этувчи куй-қўшиқ билан бошланди.

Саҳнага кўтарилган туман ҳокими Бахтияр Мамаев йиғилганларни баҳор байрами билан қутлаб, эзгу ниятларини билдирди.

– Қадрли ҳамюртлар! Улуснинг улуғ куни Наврўзи олам билан барчангизни самимий муборакбод этаман. Азалдан шарқ халқларининг энг эъзозли байрами ҳисобланмиш ушбу фараҳбахш кунда бир-биримизга омонлик, тинчлик-тотувлик тилаш ота-боболаримиздан қолган мўътабар қадриятдир. Мустақил элимизда ҳукм сураётган ҳамжиҳатлик, ўзаро ишонч ҳамиша бардавом бўлишини чин дилдан тилаб қоламан, – деди у.

Тадбирда туман маданият бўлимининг хонандаю созандалари ҳамда мактаб ўқувчилари, коллеж талабалари иштирокида қозоқ, ўзбек тилларида Наврўзни мадҳ этувчи куй-қўшиқлар янгради, рақслар ижро этилди. 

Наврўз айёми ўлкамиз бўйлаб давом этмоқда.