Шимкент шаҳар ўзбек драма театрида буюк рус ёзувчиси Н. Гоголь қаламига мансуб “Уйланиш” комедиясининг премьераси ўтди. 

Қарийб икки аср аввал яратилган мазкур асарнинг мавзуси доимо долзарб. Чунки, уйланиш, турмушга чиқиш ҳар бир инсоннинг бошида бор савдо, бунинг атрофида турли воқеалар рўй бериши аниқ... 

Гоголь комедияларини саҳнада талқин этиш ҳар қандай касбий театр учун шараф, бундай асарда роль ижро этиш эса ҳар бир актёрнинг орзуси. Айтиш жоизки, Гоголь драматургияси жамоа учун янгилик эмас. Бир неча йил муқаддам театрда муаллифнинг “Ревизор” асари муваффақиятли саҳналаштирилган эди. Бу тажриба театр жамоасига жуда қўл келди. 

Асарни театр бош режиссёри Қ. Қасимов саҳналаштирган. Саҳна безакларини бош рассом С. Жаҳонгиров тайёрлаган. 

Бош роль ижрочиси Ж. Саидов қаҳрамонининг қалбидаги ғалаёнларни, субутсизлигини рўйи-рост очиб беради. У дўсти Кочкаревнинг шиддати олдида эсанкираса-да, барибир, айтганини қилиб, ҳал қилувчи фурсатда жуфтакни ростлаб қолади...

Шу ўринда С. Маҳмудов, О. Тўғонбоев, У. Носиров, А. Эрхонов, Д. Иброҳимжонова, В. Нишонбоева, К. Шодибекова, шунингдек, ёш актёрлардан Ш. Ходиматов, М. Забборхонов, В. Абдураҳмонова, Б. Искандаров, Д. Раҳмоншиқова, Э. Тўламатовларнинг саҳнада образларни тўлақонли акс эттириш борасидаги самарали ижодий изланишларини таъкидлаш жоиз.

Премьерадан сўнг директор И. Ҳошимжонов сўз олиб, театр жамоасининг яқин кунларда Россия мамлакатининг Қрим диёрида ўтадиган нуфузли халқаро фестивалда иштирок этишини маълум қилди. Ўзбек театри унда Софоклнинг “Шоҳ Эдип” фожиаси билан қатнашади. Санъаткорларга муваффақият ва омад тилаймиз!