Халқаро болаларни ҳимоя қилиш кунида  дунё бўйлаб болалар кулгуси янгради. Бу –  фарахбахш дамлар, гўзал туйғулар, қувончдан порлаган нигоҳлар уйғунлашган кун бўлди. Шимкент шаҳри, Енбекши туманининг Жулдиз ҳамда Қоратепа даҳаларида жойлашган мактабларнинг 60 нафар ўқувчисига ҳомийлар томонидан байрам тадбири уюштирилди.

Тадбир ҳомийлари – Енбекши туман ўзбек этномаданият бирлашмаси раиси Тоҳир Нишон­боев ҳамда тадбиркорлар Байкен Ашир­баев, Ҳасан Шоҳайдаровларнинг  ташаббусини қўллаб-қувватлаган  Қоратепа даҳаси аҳоли билан ишлаш бўлими бошлиғи Самат Жунусбаев, ша­ҳар ўзбек этномаданият бирлашмаси раиси То­ҳир Ҳакимбеков, вилоят ўзбек этномаданият бирлашмасининг хотин-қизлар қўмитаси раисаси Зуҳра Илёсова ҳамда овул бийлари  “Дилбар” қаҳвахонасида ёзилган дастурхонга болаларни таклиф этиб, самимий тилакларини изҳор қилишди.

Байрамнинг янада жозибадор ўтишида вилоят ўзбек драма театри актёрларининг концерт дастури айни муддао бўлди. Эртак қаҳрамонлари билан бирга қизиқарли ўйинларда қатнашиб, хонандалар А. Эргашев, Ш. Ходиматов, М. Забборхонов, Ф. Зо­киржоновларнинг шўх қўшиқларига рақсга тушган болажонларнинг беғубор кулгуси барчага хушкайфият бахш этди.

Тадбир сўнггида сахий тадбиркорларнинг совғ­а­ларини олган ўғил-қизлар ҳамда мактаб ижтимоий педагоглари ташкилотчиларга миннатдорчилик билдириб, эсдалик суратларга тушишди.