Мақтаарал тумани сабзавоткорлари апрель ойининг ўрталарига етмай, Россия Федерациясининг Қозон шаҳрига карам экспорт қилдилар. Йиғим-терим ишларига гувоҳ бўлган вилоят қишлоқ хўжалиги бошқармаси раҳбарининг ўринбосари Т. Ўспанов сабзавотнинг эртапишар турларини етиштиришда пешқадам мақтаараллик деҳқонлар ишидан мамнун бўлди.

Жорий йилда улар дала ишларини январь ойидаёқ бошлаб юборган эди. 342 гектарга сабзавот экилди, шундан 281 гектарини карам ташкил қилади. 22 гектарда қизил лавлаги, 20,5 гектарда булғор қалампири, 17,5 гектарда помидор, 1 гектарда бодринг, 32 гектарда эса картошка етиштирилмоқда.

Мақтаарал овул округидаги “Шишкин” деҳқон хўжалиги бу борада олдинда. Хўжалик 3 гектарга карам, бир гектардан кўпроқ ерга булғор қалампири ва бақлажон эккан. Экинлардан томчилатиб суғориш усули туфайли мўл-ҳосил олинмоқда. 

Туман ҳокими Алим Ибраев эртапишар сабзавот етиштириш борасида бир неча бригада тер тўкаётгани ва уларнинг аъзолари кунига 2000-3000 тенгедан ҳақ олишаётганини айтди. 

Айнан шу деҳқон хўжалигида етиштирилган 70 тонна карам Қозон шаҳрига жўнатилди.