Жорий йил 1 июнь – Халқаро болаларни ҳимоя қилиш кунида анъанага кўра, турли хайрия тад­бирлари уюштирилди. Зеро, болаларнинг чеҳ­­­­­­­­­расида табассум кўрганимизда, уларнинг қу­вончи ва шодлигига гувоҳ бўлганимизда дилла­римиз яйрайди, чор-атроф гўзаллашиб, осмон мусаффолашади. 

Шундай тадбирлардан бири Сайрам даҳасидаги “Сарвар” тўйхонасида уюштирилди. “Болалар – бизнинг келажагимиз” мавзусидаги мазкур хайрия тадбири Шимкент шаҳрининг Қаратау тумани ҳокимлиги ва туман ўзбек маданият бирлашмаси ташаббуси билан ўтди. 

Тадбирда сўз олган Қаратау тумани ҳокими Ға­бит Мауленқулов, меҳнат фахрийси Қувонч Абдураҳмонов, Қозоғистон ўзбек этномаданият бирлашмалари “Дўстлик” ҳамжамиятининг раиси, вилоят ўзбек драма театри директори Икром Ҳошимжонов, тадбиркор Тамара Ботирхоновалар болаларни табриклашиб, эзгу ниятларини изҳор этишди.

– Бугунги тадбирга аҳоли манзилидаги барча таълим муссасаларининг кам таъминланган ҳамда кўп болали оила фарзандлари, жами 565 нафар болалар жалб этилди, – дейди Қаратау тумани ўзбек этномаданият бирлашмаси раиси Ф. Нурметов. – Фурсатдан фойдаланиб, ташаббусимизни қўл­­лаб-қувватлаган барча ҳомийларга ўз миннат­дорчилигимизни билдирамиз!

Тадбирда вилоят ўзбек драма театри артистлари, “Сайрам” коллежи, 12-сонли ихти­сослаштирилган спорт мактаби, “Гул Астана”, “Жамолой она”, “Назира она” болалар боғчалари ҳамда даҳадаги умумтаълим мактабларининг бадиий ҳаваскорлик жамоалари иштирокида концерт намойиш этилди. 

Болалар тўкин дастурхон атрофида мириқиб дам олиб, куй-қўшиқлар, турли саҳна кўринишларидан бир олам завқ олишди. Мана шундай ажойиб тадбирни уюштиришга саховатли тадбиркорлар Тўйчивой Холметов, Сайдазимхон Эралиев, Ҳавазмат Тўламетовлар беғараз ёрдам кўрсатишди.

Тасвирда: тадбирдан лавҳа.