Собиқ битирувчилар бир оилага уй, мактабга автобус туҳфа қилдилар

Туркистон вилоятида “Маънавий янгиланиш” дастури доирасида “Олтин уям” лойиҳаси йўлга қўйилганди. Мақсад – битирувчиларнинг йигирма, ўттиз йиллик учрашувларини юбилей тарзида нишонлашга эмас, туғилган ерга эзгу амаллар билан ҳисса қўшишга даъват этишдан иборат эди. Ўтган йилдан бери шу йўналишда иш юритилиб, битирувчилар хайрли ишга ҳисса қўша бошладилар. Чунончи, яқинда Чордара туманида собиқ битирувчилар кўпболали оилага уй совға қилишди.

Чордара тумани, Қўссейит қишлоғидаги “Сырдария” умумий ўрта мактабининг 1999 йилги битирувчилари 20 йиллик муносабати билан Волоткинлар оиласига уй ҳадя қилдилар. Бошпанали бўлган Андрей ва Анастасиянинг 9 фарзанди бор. Доимий иш бўлмаганлиги сабабли, ижарага квартира олиб, қийналиб юрган оила замонавий уйга кўчиб ўтдилар. Битирувчилар ўзлари билим олган масканга интерфаол тахта, проектор ҳамда компьютер туҳфа қилиш билан чекланмай, синфдоши Анастасияни қўллаб-қувватладилар. Уларга газ плитаси ҳамда гилам совға қилишди. Кўпболали оила қувончига шерик бўлиб, қишлоқ аҳлига дастурхон ёзишди. Мазкур тадбирда Чордара тумани ҳокими ўринбосари Бауржан Шўмпиев иштирок этиб, саховатли инсонларни туман ҳокимининг фахрий ёрлиғи билан тақдирлади. 

“Олтин уям” лойиҳаси доирасидаги эзгу ишлар Сўзоқ туманида ҳам давом этди. Тумандаги Ш. Уалиханов номли мактабнинг 1999 йилги битирувчилари ўзлари ўқиган мактабга “ГАЗель” микроавтобусини тортиқ қилдилар. Мактаб жамоаси ҳамда устозларини қувонтирган шогирдлар туғилган ерни қадрлашда кўпчиликка ибрат бўлишди.