ЕР ОСТИ БОЙЛИКЛАРИДАН ФОЙДАЛАНИШ БЎЙИЧА КОМИССИЯ ТУЗИЛДИ

Туркистон вилояти ҳокими Ўмирзақ Шўкеев раислигида девон мажлиси ўтди. Йиғилишда ер ости бойликларидан ноқонуний фойдаланишни тўхтатиш ва шартнома бўйича олиб борилаётган ишлар ҳақида сўз юритилди. 

Мажлисда ер ости қазилма бойликларидан фойдаланишни кўзда тутувчи шартномалар бўйича ишларнинг бориши ва ер ости бойликларидан ноқонуний фойдаланишга чек қўйиш хусусида вилоят табиий захиралар ва табиатдан фойдаланишни созлаш бошқармаси раҳбари вазифасини бажарувчи Г. Саметова маъруза қилди.

– Вилоят ҳудудида бугунги кунда ҳаммаси бўлиб 190та ер ости бойликларидан фойдаланиш ҳақидаги шартнома рўйхатга олинган. Шундан, қаттиқ фойдали қазилмалар бўйича – 38, ер ости сувлари бўйича – 28, кенг тарқалган фойдали қазилмалар бўйича – 124. Шартномаларнинг 10таси текширишга ва 112таси ишлаб чиқаришга берилган. Кенг тарқалган фойдали қазилмалардан тош, шағал, қум, тупроқ, ганч, ош тузи, оҳактош ишлаб чиқарилади. 2018 йили шартнома вазифаларини бажармаган – 69, жорий йилнинг 1 чорагида 29 фойдаланувчига эслатма йўлланиб, 15та шартноманинг кучи йўқотилди. Мураккаб масалалардан бири – дарё соҳилларида, қишлоқ хўжалиги ерларида фойдали қазилмалардан ноқонуний фойдаланиш ҳақидаги хабарларнинг учраётгани.

Прокуратура органлари билан биргаликда, фойдали қазилмалардан ўзбошимчалик билан фойдаланишни тўхтатиш учун вилоят ҳокимлиги ҳамда мутасадди давлат идоралари томонидан қўшма минтақавий чора-тадбирлар режаси тайёрланди, – деди Г. Саметова.

Маърузани тинглаган вилоят ҳокими Ўмирзақ Естайули ер ости конларидан фойдаланувчиларнинг шартномаларини пухта, қайта текшириб, вилоят комиссиясини тузишни топширди. Шунингдек, шартнома бандларини бузган ҳар қандай шахс билан тузилган шартнома бекор қилинишини айтиб ўтди.