ҚР Мажлиси депутатлари қозоғистонликларнинг давлат хизматларини олишини соддалаштириш бўйича қонун лойиҳасини биринчи ўқишдаёқ маъқуллашди. Бундан буён бир-бирига дахлдор бир нечта хизматни битта ариза  билан олиш мумкин.

 Жорий йилда давлат хизматларининг 80 фоизи электрон шаклга кўчирилди, келгуси йилда эса яна 10 фоиз янги шаклга ўтказилиб, улар онлайн тартибида тақдим этилади. 

Ҳозирги кунга қадар кўп давлат хизматларини олиш учун фуқаролардан прописка талаб этиларди, янги қонун лойиҳасига кўра ушбу меъёр бекор қилинади. 

Бундан буён қозоғистонликлар муқим истиқомат қиладиган жойи бўйича эмас, балки истагига кўра Қозоғистон ҳудудидаги рўйхатга олувчи ҳар қандай органга ариза топширишлари мумкин. Буларга туғилиш, ўлим, никоҳни қайд этиш ва бекор қилиш, исми-шарифи, отасининг исмини ўзгартириш, бола асраб олиш, оталикни қайд этиш ҳақидаги ҳужжатлар киради. 

Аҳоли манзили ва кўчаларнинг  номи ўзгариши кўчмас мулк эгаларидан қайта рўйхатга олиш заруратини бекор қилади – улар автомат тарзда амалга оширилади. 

Умуман олганда янги қонун меъёрига кўра 200та давлат хизмати ихчамлаштирилади!