Президент Н. Назарбаевнинг “Келажакка йўлланма: маънавий янгиланиш” Мактубида бошқа соҳалар каби динга ҳам алоҳида ўрин берилган. Шу муносабат билан ҚМДБ раиси, Бош муфти Ержан ҳожи Малғажиули барча масжид имомларига топшириқ ва вазифалар юклади. 

Ана шундай топшириқлар доирасида шаҳримиздаги “Исомиддин бобо” масжидида “Жылы жүрек” хайрия акцияси ўтди. Бундай тадбир масжидда иккинчи маротаба ўтказилаётган экан. 

– Сахий, ишбилармон тадбиркорлар томонидан бундай амаллар шаҳримиздаги деярли барча масжидларда ўтказилиб келмоқда. Насиб қилса, Қадр кечаси куни 70-80та оилага фитр садақасини берамиз, – деди масжиднинг ноиб имоми Аманкелди Мейирманов. 

“Жылы жүрек” акциясига асосан Ў. Жандосов номидаги 30-сонли ҳамда Горький номидаги 12-сонли умумий ўрта мактабларнинг бошланғич синф ўқувчилари ҳамда масжидга ариза билан мурожаат қилган етим-есир, кам таъминланган оилаларнинг фарзандлари таклиф этилди.  

Тадбирда сўз олган мазкур масжиднинг бош имоми Қодиржон Маммедов барчани Рамазон ойи ҳамда 1 июнь – Халқаро болаларни ҳимоя қилиш куни билан қутлаб, ҳомийлар томонидан олиб келинган кийим-кечакларни тақдим этдилар.