Куни кеча “Sauiet Group” қурилиш компанияси оқсувкентлик болаларга янги мактаб биносини тортиқ этди. Қишлоқнинг Чапаев даҳасида яшовчи аҳоли буни узоқ йиллардан бери орзиқиб кутганди.  Чунки, Ойшабиби номли асосий ўрта мактаб биноси эскириб, тўлақонли таълим-тарбия олишлари учун қулай  шарт-шароитлар йўқ эди. Омонулла Бекжонов етакчилигидаги маҳалла фаоллари, депутатлар, қолаверса, мактаб жамоасининг  кўп йиллик саъй-ҳаракатлари зое кетмади. Ниҳоят туман ҳокимлиги ташаббуси билан ўтган йили  1,07 гектар майдонда янги мактаб  биноси  қурилиши бошланди.

Мактабнинг тантанали очилиш маросимига туман ҳокими С. Сапарбаев, туман маслаҳати депутатлари, маҳалла фаолларидан ташқари, кўп йиллар нуфузли лавозимларда хизмат қилган Рўзақул Хол­муродов ҳам ташриф буюрди. Унда сўзга чиққан  Самат Айдарханули ҳамда Рўзақул Сотиболди ўғли сўнгги йил­ларда таълим со­ҳа­­сига Ҳукуматимиз томонидан жиддий эътибор қаратилаётгани, буларнинг ҳаммаси келажакда қишлоқ жойларда ҳам  билимли ёшлар кўплаб етишиб чиқиши учун мустаҳкам замин бўлишини бир овоздан таъкидлаб ўтишди. 

Мактаб директори Нодирхон Усмонов рамзий калитни пудратчи ташкилот вакилидан қабул қилиб оларкан, янги, замонавий илм даргоҳида ўғил-қизларнинг фақат аълога ўқиши учун устозлар жамоаси бор куч- ғайратини сарф­лашини айтди. Сўнг меҳмонлар ичкарига йўналиб, синф­хоналарни кўздан кечиришди. Ўз навбатида, устоз  ва тарбияланувчилар мазкур билим ўчоғи Болалар кунига муносиб туҳфа бўлганини яширишмади.

Суратда: янги мактабнинг очилиш маро­симидан лавҳа.