ҚР Президенти Қасим-Жўмарт Тўқаев Алматида маҳаллий аҳоли билан учрашди

Мажлисда зиёлилар, фахрийлар, касаба уюшмалари, ёшлар, маслаҳат депутатлари иштирок этдилар. 

Давлат раҳбари шу куннинг энг долзарб масалаларига эътибор қаратди.

– Бошқа минтақалар каби, Алмати вилоятида ҳам ичимли сув билан таъминлашда муаммолар бор. Ҳокимлик аҳоли манзилларининг истиқболли ривожланишини ҳисобга олган ҳолда, сув таъминоти тизими қурилиши ҳамда таъмирланиши юзасидан жадвал тузиб, ишларни шу асосида юритиши лозим,– деди у.

Шунингдек, Президент авария ҳолатидаги ва уч сменали мактаблар муаммоларига ҳам тўхталиб, Ҳукумат ҳамда вилоят ҳокимлигига 2021 йилгача мактаб қурилишига оид масалаларни ҳал этишни топширди.

Давлат раҳбари ёш мутахассисларни шаҳардан қишлоққа кўчириш учун рағбатлантириб, “Диплом билан – қишлоққа” дастури доирасида ёш кадрларни ишга қабуллаш учун шароитлар яратиш кераклигини айтиб ўтди.

Шунингдек, Қасим-Жўмарт Тўқаев ижтимоий шароити ночор оилаларни бошпана билан таъминлаш масаласига ҳам алоҳида урғу берди.

Давлат раҳбари қишлоқ хўжалигига тегишли ерлардан унумли фойдаланиш, суғориш тармоқларини янгилаш ва ирригация шохобчаларини созлаш каби масалаларга ҳам тўхталиб ўтди. 

ҚР Президенти учрашув сўнгида давлат мукофотлари меҳнат фидойиларига, шунингдек, олимлар, қурувчилар, оддий ишчиларга берилиши кераклигини таъкидлади.