Ёшлар йили ҳамда академик А. Қуатбеков номидаги Халқлар Дўстлиги университетининг 20 йиллик юбилейи муносабати билан университет Кубоги учун халқаро “Жайдарман” ўйинлари ниҳоясига етди.

Мусобақанинг мукофот жамғармаси 1,5 млн. тенгени ташкил этди. 

“Туркистон” Маданият саройида ўтган “Жайдарман” ўйинида 12та гуруҳ қатнашди, улардан 9таси Қозоғистон ҳудудидаги олий ўқув юртлари талабаларидан тузилган олий лига гуруҳлари бўлса, қолган 3таси Туркия, Қорақалпоғистон ҳамда Қирғизистон мамлакатларидан. 

Уни “Қозоғистон ҚВЗ уюшмаси” республика ёшлар жамоат бирлашмаси раиси Есен Елеукен олиб борди.

“Энг яхши ўйинчи” (100000 тенге) номинацияси Семей шаҳридан “Элемен” гуруҳи аъзоси Элдар Жумағалиевга насиб этди. Совринли 3-ўрин ҳамда 300 минг тенгени ақтўбелик “Фемида” жамоаси эгаллаган бўлса, 2-ўрин ва 400 минг тенге мукофотга Ўралнинг “Грант” жамоаси сазовор бўлди. Халқаро “Жайдарман” ўйинларида ғолиблик кубок ва 700 минг тенге пул мукофоти эса “Бойнинг болалари” (Шимкент) гуруҳига насиб этди.