Пойтахтда ХII Астана иқтисодий форуми бошланди. “Илҳомлантирувчи ўсиш: одамлар, шаҳарлар ҳамда иқтисодиётлар” мавзуидаги халқаро анжуманнинг пленар мажлисида Қозоғистоннинг Тўнғич Президенти Н. Назарбаев ва Қозоғистон Президенти Қасим-Жўмарт Тўқаев иштирок этишди.

Икки кун давом этган форумнинг пленар мажлиси ЭКСПО – 2017 кўргазмалар мажмуаси базасидаги Конгресс-марказда ўтди. Мажлисда Нобель мукофотининг лауреатлари, жаҳонга машҳур таҳлилчилар, сиёсатшунослар, дунёнинг кўзга кўринган бизнес вакиллари қатнашдилар.

Пленар мажлисга Euronews мухбири Штефан Гробе модераторлик қилиб, CNN мухбири Жон Дефтерилс форум доирасидаги бир қатор сессияларни олиб борди.

 Euronews мухбири Штефан Гробе даставвал сўзни Қозоғистоннинг Тўнғич Президенти Н. Назарбаевга берди. Элбоши ўз сўзида Астана иқтисодий форумида тилга олинган таклиф ва хулосалар Қозоғистоннинг дунёвий таҳдидларга ўз вақтида жавоб қайтаришига имкон берганлигини айтди.

– Ушбу форумда кўтарилган мавзуларнинг барчаси яқин йиллардаги ривожланишга таъсир кўрсатадиган стратегик масалалардир. Шу йиллари G-Global лойиҳалари, дунёвий экология, ишсизликка қарши кураш, одам капиталини ривожлантириш, янги энергия манбаларини ҳам қўшганда, кенг қамровли масалаларни муҳокама қилдик. Ўтган йили глобал таҳдидлар саммитини ўтказдик. Форум доирасида БМТ Бош ассамблеясининг қўллови билан тангликка қарши иккита конференция уюштирдик. Бунгача ўтган форумларнинг хулосалари Қозоғистоннинг ривожланишига ижобий таъсир кўрсатди. Бизнинг фикр ва таклифларимиздан бошқа минтақаларда ҳам фойдаланилди, деб ўйлайман, – деди Н. Назарбаев.