Қозоғистон Президенти Қасим-Жўмарт Тўқаев Мудофаа вазирлиги ҳайъатининг кенгайтирилган мажлисида қатнашди

Қозоғистон Президенти – Олий Бош қўмондон Қасим-Жўмарт Тўқаев Элбошининг доимий қўллови натижасида Қозоғистонда замонавий, тезкор ва жанговар қобилиятга эга армия ташкил этилганини, унинг асосий вазифаси – давлатнинг мустақиллиги ва ҳудудий яхлитлигини таъминлаш эканлигини таъкидлади.

– Қуролли Кучлар  раҳбарлари таркиби олдида нафақат юз бераётган ўзгаришларга мослашув, балки, жараёнлардан ўзиб ҳаракат қилиш вазифаси ҳам турибди. Бу таҳдид ва хавф-хатарларни ҳар томонлама таҳлил қилишни тақозо этади. Бугун биз геосиёсий зиддиятларнинг кескинлашувига, янги низоларнинг вужудга келишига гувоҳ бўлмоқдамиз. Жанговар ҳаракатларни олиб боришнинг шакллари ва усуллари ўзгарди, аниқ нишонга оладиган қуроллар ва бошқа замонавий қурол-аслаҳаларнинг улуши ортди, – деди Қозоғистон Президенти.

Давлат раҳбари Мудофаа вазирлиги раҳбар таркиби олдига қарор қабул қилиш муддатини имкон қадар қисқартириш мақсадида бошқарув тизимини замонавийлаштириш вазифасини қўйди. Шунингдек, роботлаштириш, рақамли технологиялар, сунъий заковат ва учувчисиз тизимларни жорий этишнинг муҳимлигини кўрсатди.

– Кадрлар тайёрлаш ва ҳарбий-ватанпарварлик тарбия доирасида бўлғуси ҳарбий муҳандислар, IT мутахассислари, робототехниклар ва сунъий заковат бўйича мутахассисларни етиштириш лозим. Булар “SMART” деб аталмиш авлоддир. “Ёш сарбоз” ҳаракати негизида, биринчи галда физика-математикага ихтисослашган мактабларда “SMART-SARBAZ” тўгаракларини ташкил этишни таклиф қиламан, – деди Қасим-Жўмарт Тўқаев.

Давлат раҳбари келгуси ҳафтага режаланган, тинчликпарварликка бағишланган форум келгусида Қозоғистоннинг фаол тинчликпарвар давлат сифатидаги салоҳиятини оширишга янги туртки беришини таъкидлади.

– БМТнинг тотувлик миссиясида иштирокимиз доирасини кенгайтириб, Қозоғистон нафақат пиёда қўшинларини, балки, муҳандис-сапёр, разведкачи, шифокорлар таркиби ҳамда бошқа бўлинмаларни ҳам юбориши даркор, – деди у.

Олий Бош Қўмондон тадбирдан сўнг Мудофаа вазирлигининг стратегик бошқарув маркази фаолияти билан танишди.