Туркистон вилояти Жетисай тумани Жайлаукўл аҳоли манзилида яшовчи миришкор деҳқон Совет Тастанули тарвузнинг илк 40 тоннасини Россиянинг Новосибирск шаҳрига жўнатди. 

Йигирма йилдан буён деҳқончилик билан шуғулланиб келган полизчи март ойида 4 гектарга тарвузнинг “Атаман” навини экканди. Ҳосилдорлик гектарига 30 тоннани ташкил этмоқда. Деҳқон тарвузнинг  килосини 220 тенгедан сотмоқда.

– Бу йил туманимиз иқлими деҳқончиликка жуда қулай келди. Натижада, март ойининг биринчи беш кунлигида пленка остига тарвуз экдик. Экин майдонининг ҳар гектарига тахминан 1 млн.тенге харажат қилдик. Об-ҳаво қулайлиги сабаб, бугун, мана, биринчи ҳосилимизни савдога чиқардик, – дейди Совет Тастанули.

Деҳқоннинг тарвузи биринчи ҳосил эмас. Бундан 15 кун аввал у 4 гектардан 100 тоннадан зиёд карам ҳосили олган. Килосини 150-180 тенгедан сотибди. Ҳосил йиғиштириб олингач, унинг ортидан пахта эккан.

Бугунги кунда “С-Тастаната” деҳқон хўжалигининг экин майдонида 50га яқин киши меҳнат қилади. Уларнинг ҳар бирига кунига 3-4 минг тенгедан ҳақ тўланмоқда.