Қозоғистон Президенти Қасим-Жўмарт Тўқаев хизмат сафари билан Жамбил вилоятига келди.

Давлат раҳбари иш сафарини минерал ўғитлар ишлаб чиқарувчи “Қазфосфат” МЧБ фаолияти билан танишишдан бошлади.

Қозоғистон Президентига йилига 300 минг тоннадан 500 минг тоннагача минерал ўғит ишлаб чиқарувчи технология тармоғи ҳақида маълумот берилди. Шунингдек, корхонада маҳаллий хомашёдан фойдаланилиши, Қоратов шаҳрида қазилган фосфат хомашёси шу ерда қайта ишланиши ҳақида маълумот берилди.

– Бу – кимё саноатида, шу жумладан, сариқ фосфор ишлаб чиқаришга ихтисослашган халқаро даражадаги етакчи корхона. Ушбу имкониятлар халқаро бозорларга ўз маҳсулотларингиз билан чиқишга ижобий таъсир кўрсатади. Рақобатбардошликни янада кучайтириш лозим, – деди Қасим-Жўмарт Тўқаев.

Мазкур корхона 1951 йили ташкил этилган бўлиб, асосий фаолияти – кимё саноати. Мингдан зиёд ишчи меҳнат қиладиган бу заводда ўртача ойлик маош – 148 минг тенгедан ошади. Корхонанинг маҳсулотлари Европа иттифоқи давлатлари, АҚШ, Хитой, Япония ва БААга экспорт қилинади.

Давлат раҳбари, шунингдек, Халқ қаҳрамони Ғазиз Байтасовнинг оиласи билан учрашди.

Давлат раҳбарига хизмат фаолиятида қаҳрамонларча ҳалок бўлган 

Ғ. Байтасовнинг хотирасига ўрнатилган ёдгорлик тахтачаси, унинг фотосуратлари, медаллари кўрсатилди.

Қасим-Жўмарт Тўқаев Халқ қаҳрамонининг рафиқаси ҳамда ўғиллари билан суҳбат давомида оталарининг жуда масъулиятли ва қийин вазиятда ҳам ўз ишига содиқ қолганлигини, унинг мардлиги ҳеч қачон унутилмаслигини таъкидлади. 

Давлат раҳбари Қасим-Жўмарт Тўқаев «Арай Плаза» мажмуасида ўтган якунловчи йиғилишда  қатнашиб, минтақанинг таълим, соғликни сақлаш ва бошқа муҳим соҳаларига тўхталди. Шунингдек, вилоятнинг иқтисодий имкониятларидан тўлиқ фойдаланиш, қишлоқ хўжалигида меҳнат унумдорлигини ошириш, туризмни ривожлантириш, минтақалар орасидаги тафовутни камайтириш, бу ерда долзарб бўлиб турган уюшган жиноятчиликни бартараф этиш, йўлларни яхшилаш, таълим иншоотларини кўплаб қуриш, ёшларни қўллаб-қувватлаш, ҳуқуқни муҳофаза қилиш органларининг фаолиятини яхшилаш, айниқса минтақадаги ўғирлик ҳолатларининг олдини олиш борасида аниқ топшириқлар берди.

Қасим-Жўмарт Тўқаев учрашув сўнгида шифокор, ўқитувчи ва тадбиркорлардан бир гуруҳини “Алғыс хат”лар билан тақдирлади.