Маиший техника воситаларини фоизсиз кредит ҳисобига олиб, ой сайин маошидан тўлаб турган ҳамюртлар унинг анча қулайлиги, насия салмоғи ҳам деярли сезилмаслигини кўп айтишади. Уларнинг хизматларидан фойдаланганим боис, шаҳримиздаги иккинчи даражали банк ходимларидан бот-бот қўнғироқлар бўлиб туради. “Миллионгача кредит олиш имконингиз бор. Истаган пайтингизда уйдан чиқмай хизматларимиздан фойдаланишингиз мумкин. Насия тўлаш тарихингиз банкларда ижобий таассурот қолдирган. Шу боис, сиз билан ҳамкорликни давом эттиришга тайёрмиз” дейишади улар. Бундай қўнғироқлар жонга теккач бир куни шундай жавоб беришга ҳам тўғри келди: “Сизлардан фоизсиз техник ашёларни харид қилганман. Бироқ, фоизли кредитлар олишдан Яратганнинг ўзи асрасин. Хизматингизга раҳмат!”. “Кредит, уйга келган қора ит” деган хулосаларни қарз юкидан кўп куйганлардан эшитиб, бежиз айтилмаганлигига гувоҳ бўлганман. Молиявий қийинчиликлар гирдобига тушиб, бошга дўппи тор келиб қолган чоғда бирон бир қариндошингиздан қарз сўролмайсиз, чунки ҳар бир оила ҳамин қадар рўзғор тебратиб тургани маълум. Иложсиз қолган вазиятда банкларга мурожаат қиласиз. Улар хизматларининг шартларини майда ҳарфлар билан тўлдирилган бир дунё ҳужжатлар билан тақдим этишади. Танг аҳволда қолган киши учун халоскор бўлиб кўринган банк шартларини деярли ҳеч ким ўқимайди.
Бу хизматлар эвазига қанча устама билан олаётган маблағни қайтара оламизми йўқми, кўпчилигимиз мушоҳада қилиб ўтирмаймиз ҳам. Иложи борича пулни олсагу, кўзлаган мақсадларимизга сарфласак, дея ошиқамиз – узатилаётган қизга сеп харид қилиш керак, қудалари олдида уялиб қолмасин, тўйнинг дастурхонини ҳам тўкин қилиш керак, салондан янги машина олиш керак ва ҳоказо. Тўланиши йилларга чўзилади қарзнинг қанча машаққатлар келтириб чиқаришига эса, амалда гувоҳ бўляпмиз. Дўппини бир чеккага олиб, йиллар мобайнида қанча тўлаётганимизни бир ҳисоб-китоб қилсак, қарзимизни икки-уч баробар қилиб қайтараётганимизни англаймиз. Фоизи майлику-я, унга қўшимча равишда мазкур кредитингизга тўлов қабул қилаётгани учун ой сайин банкка комиссия тўловини ҳам тўлаб борасиз. Мантиқни қаранг: қарз оляпсиз + фоизини тўлаяпсиз + унинг ҳисобини юритиб тургани учун банкка комиссия тўлаяпсиз!
Табиийки, ҳужжатда сизнинг имзоингиз турибди, бироқ нима учундир бу нарсалардан бехабарсиз. Ҳисоблаб кўрилса, баъзи юртдошларимиз фақат комиссиянинг ўзига миллионлаб тўлаб қўйишаркан.
ҚР Миллий банки берган маълумотга кўра 2018 йилда фақат жисмоний шахсларга 3,31 трлн. тенге истеъмол кредити берилган. Йил охирига келиб ипотека кредитлари ҳажми 1,3 трлн. тенгени ташкил этган. Мана шу миқдордан келиб чиқиб, фақат комиссияларнинг ўзида жисмоний шахслардан банклар қанча даромад олиб ўтиришганини тасаввур қилса бўлади. 2016 йилга қадар бундай комиссияларнинг тури 40 га яқин бўлиб, шу йилнинг 1 июлида уларнининг турлари қисқарди. 2018 йил 16 июлдан қарздорларнинг харажатларини қисқартириш мақсадида жисмоний шахсларга ипотека кредити бўйича банк ҳисоби юритишида комиссия олиниши тақиқланди. Бироқ, шундай бўлсада, ҳамюртларимиз комиссияларни тўлайверишди.
Жорий йилнинг 21 январидан Миллий банк ташаббуси билан фуқаролар манфаатларини ҳимоялаш мақсадида “Қозоғистон Республикасида Банклар ва банк фаолияти тўғрисида” Қонунига ўзгартишлар киритилди. Унга кўра энди тадбиркорлик фаолияти билан боғлиқ бўлмаган хизматлар ва товарлар хариди учун жисмоний шахслардан банк заёми шартномаси учун комиссиялар олиниши тақиқланади. Қонун жорий йилнинг 4 мартида кучга кирди. Шу кундан эътиборан банкдан насия олаётган жисмоний шахслар комиссия тўловларини тўлашмайди. Юртимиздаги бешта иккинчи даражали банк – АТФ банк, Альфа-Банк, Евроосиё банки, Казкоммерцбанк(Халқ банки ҳуқуқларида), ForteBank шахсий ташаббусига кўра амалдаги шартномалар асосида бир томонлама тартибда комиссиялар тўлови бекор қилинди. 18 мартдан бошлаб юқоридаги банклар қарздорларига бу ҳақда хабарлар тарқатди. Миллий банкнинг ҳисобича, бешта банкнинг комиссияларни бекор қилиши қарийб 180 минг мижознинг деярли 30 млрд. тенгесини тежаб, ҳамёнларида қолдирар экан.
Шимкент шаҳар судида бўлиб ўтган йиғин айнан мана шу масалага бағишланди. Шимкент шаҳар адвокатлар ҳайъатининг ташаббуси билан уюштирилган давра суҳбатида Шимкент шаҳар суди фуқаролик ишлари бўйича суд ҳайъатининг раиси М. Парменов, шуҳар суди судьялари В. Мирошников, А. Чокморова, Г. Қидирбаева, оқловчилардан С. Баймуратов, Шимкент шаҳридаги иккинчи даражали банкларнинг вакиллари иштирок этишди. Судья В. Мирошников ўз сўзида комиссия тўловларини олиш тартибини белгилайдиган қонунга киритилган ўзгартишлар анча баҳсларга чек қўйганини маълум қилди.
– Қонунга ўзгартишлар 21 январь куни киритилди, 3 февраль куни эса у кучга кирди. Мазкур қонуннинг 2-модда 2-банди эса, “мазкур қонун кучга кирган кундан бошлаб бир ой ўтгандан сўнг тузилган шартномалар” бўйича банкларнинг комиссия олиши тақиқланди, – деб иқтибос келтирди судья. – Демак, жорий йилнинг 4 мартидан бошлаб бундай тўловлар олиниши тақиқланган. 4 мартга қадар банклар комиссия олишга ҳақли бўлишган деб англаш лозим. Шундай бўлса ҳам, қонун 4 мартга қадар тузилган шартномалар асосида комиссиялар олишни тақиқлаётгани йўқ. Янги қонунга қадар судлар қарздорларнинг ҳуқуқларини ҳимоя қилиб, комиссияларни уларга ундириб беришди. Буни соддароқ қилиб ифодаласак, қонун кучга кирди, комиссия тўловларини суд орқали қайтаришга муваффақ бўлганлар улгуриб қолишди, кечикканлар эса...
Александр Арутюнян, адвокат:
– Комиссиялар масаласида кўп мижозлар бизга мурожаат қилишди, ҳали ҳам улар комиссияларни қайтариш умидида, анчаларига самарали хизмат кўрсатдик. Қарзларни миллионлаб ундирган банкдан маблағни қайтариш бўйича суд ҳукмлари чиқди. Анча мижозларимизнинг молиявий ҳуқуқларини ҳимоялашга улгурдик.
Судья А. Чокморова:
Ҳар бир иш юзасидан суд аниқ қарор қабул қилади ва мавжуд вазиятлар эътиборга олинади. Комиссияларни ундириб бериш хизматларини тавсия этган ҳуқуқшунослар самарали фаолият юритишди. Биз бундай вазиятларни ҳам ўрганиб чиқдик.
Кимдир банкларни, кимдир эса судларни айблаяпти. Бироқ, эътибор жоизки, кўпчилик кредит олаётган пайтда шартномаларни деярли ўқимайди. Ундаги кўп жиҳатлар эътибордан четда қолиб кетади. Фуқаролик кодексида эса ўз эркига кўра шартномани имзоладими, у ҳолда мажбуриятни тўла ҳажмда ва сўнггигача бажариш керак. Шу боис ҳам ҳамюртларимизга имзолаётган ҳужжатларини диққат билан ўрганиб чиқишни маслаҳат бераман, айниқса кредит олаётган пайтингизда ҳушёр бўлинг. Борди-ю банк 4 мартдан кейин тузилаётган шартномага кўра комиссия олаётган бўлса, суд у ҳолда қарздорнинг ҳуқуқларини ёқлайди. Бу шартноманинг қачон тузилганига боғлиқ.
Йиғин поёнида адвокатлар, судьялар, банклар вакиллари жисмоний шахслар банклар билан битимни имзоламасдан аввал ҳуқуқшунослар билан маслаҳатлашиб, иш кўрсалар, тушунмовчиликларга, суддаги даъволарга барҳам берилишини эътироф этишди.