Учрашув чоғида ҚР Президенти ОАВ вакилларининг сайловга оид саволларига жавоб берди. 

– Мени ёқлаб овоз берган Қозоғистон фуқароларига миннатдорчилик билдираман, бу менга катта масъулият юклайди. Ва бу жавобгарликни оқлаш – мен учун жуда катта вазифа. Бу – халқнинг ишончи. Сайлов юқори савияда, очиқ ва одилона ўтди. Мингдан ортиқ халқаро кузатувчилар сайловнинг боришини кузатиб туришди, 350га яқин хорижлик журналистлар ахборотни бутун жаҳонга тарқатишди, – деди Қасим-Жўмарт Тўқаев, сўнг қўшимча қилди:

Биласизларми, бунинг учун барча шарт-шароитлар яратиб берилди. Номзодлар ўз сайловолди дастурларини эълон қилдилар. Бу эса фуқароларнинг мамлакатимиз тақдирига зўр масъулият билан ёндашишларини кўрсатади. Қозоғистон халқи мамлакатни ривожлантириш стратегиясининг бардавомлигини қўллаб-қувватлайди.

Президент, шунингдек, ўтган сайлов ҳақидаги фикрларини ўртоқлашди.

Ўтган сайлов адолатли, шаффоф бўлди, деб ўйлайман. Сайловда 7 номзод қатнашди, уларга тенг шароитлар яратиб берилди. Қозоғистон халқи ворисдошликни қўллаб-қувватламоқда, – деб тугатди сўзини Давлат раҳбари.

ҚР Президентини улуғлаш маросимини 12 июнда ўтказиш мўлжалланмоқда.