Жаҳон соғликни сақлаш ташкилотининг маълумотига кўра, сўнгги йилларда саратон касаллиги кўпайиб бормоқда.
Мутахассислар ва таҳлилчилар дунё бўйича онкологик касалликлар оқибатида ҳаётдан кўз юмиш жами ўлим ҳолатларининг 13 фоизини ташкил этаётганини таъкидламоқдалар.
Барчада бирдек қўрқув ҳиссини уйғотадиган, даволаниши қийин кечадиган касаллик – саратоннинг илк кўринишлари милоддан аввал тахминан 450-йилларда, жаҳон тиббиётининг асосчиси Гиппократ томонидан ўрганилган бўлиб, олимнинг «Карциноз» номли трактатида кўкрак бези саратонига таъриф келтирилгани тўғрисида маълумот бор. Айнан ана шу асарда илк бора қўлланилган «onkos» сўзи кейинчалик саратон касаллигини ўрганиш билан боғлиқ барча фанларнинг «онкология» деган умумий ном остида бирлашишига олиб келган. Эътиборлиси, у даврларда микроскоп ва шунга ўхшаш ускуналар бўлмагани боис, саратон ташҳиси беморнинг аҳволини кузатаётган шифокорнинг тахминлари асосида қўйилган.
Вилоят онкология диспансерининг олий тоифали радиогинекологи Докторкул ТАСБАЛТАЕВА билан шу касаллик ҳақида суҳбатлашиб, бир нечта саволга жавоб беришини илтимос қилдик.
– Суҳбатни саратоннинг келиб чиқиш сабабларидан бошласак. Нима сабабдан вилоятимизда сўнгги йилларда бу касалга чалинаётганлар сони ўсмоқда?
– Дарҳақиқат, саратон хасталиги кеча ёки бугун пайдо бўлиб қолгани йўқ. У неча асрлардан бери, одамлар ҳаётига зарар етказаётган бўлса ҳам, ўлимдан дарак дегани эмас. Ҳар бир инсон танасида рак шишларини пайдо қилувчи хавфли ҳужайралар мавжуд. Саратон – хавфли ўсма. У одам танасидаги ҳужайраларда тез ривожланади. Бу ўсма одамнинг деярли бутун аъзосида бўлади ва касал бошланган пайтда заифлашган ҳужайраларни емира бошлайди.
Аксарият ҳолатларда одамлар касаллик белгиларидан бехабар бўлиб ёки қандай даволанишни билмай, бу дунёдан бевақт кўз юмадилар. Давлатимиз аҳоли саломатлигига катта эътибор қаратиб келмоқда. Жумладан, профилактика чораларига ҳам. Юртимизда саратонни эрта аниқлаш мақсадида скрининг-текширувлар мунтазам ўтказилиб турибди. Ҳар қандай касалликнинг ўзига хос белгиси бўлади ва уни ўз вақтида аниқлаш муҳим.
Саратонни келтириб чиқарувчи сабаблар сифатида организмимизга кучли таъсир кўрсатаётган экология, стресс, сифатсиз озиқ-овқатлар, нотўғри овқатланишни келтиришимиз мумкин.. Нотўғри овқатланиш оқибатида инсон танасининг ички органларида моддалар алмашинуви сустлашиб, қон томирлари кенгайиши натижасида жигар, ўт қатламларида ўзгаришлар келиб чиқади.
Қон томирларида юз бераётган ўзгаришлар натижасида аёлларимизда фиброма, миома, киста, мастопатия каби ўсмалар пайдо бўлади. Бошқа хавфли ўсмалар каби, саратон ҳам ўзи пайдо бўлган жойдаги ўзаро боғланган ва организмда маълум бир ҳаётий вазифани бажарадиган ҳужайралар бирикмаларини емиради. Емирилиш оқибатида рецидив, метастаз бериши, бутун органга таъсир қилиши, одам қоқсуяк бўлиб қолиши мумкин.
– Ёшларимиз орасида саратоннинг кўпайишини қандай шарҳлайсиз?
– Юқорида таъкидлаганимдай, бу касаллик тўсатдан пайдо бўлмайди. Сурункали кечадиган патологик ўзгаришлардан сўнг ривожланади. Тўқимада ўсимта ҳосил бўлгандан кейин касаллик белгилари юзага чиқади ва ўсаётган аъзонинг функцияси кескин бузилади. Саратон аёлларда бачадон, сут безларида ва тери, ошқозон аъзоларида кузатилади. У, организмнинг қайси қисмида ривожланишидан қатъиназар, қаттиқ оғриқ бермайди.
Аёллар жинсий аъзоларининг яллиғланиш касалликлари гинекологик касалликлар орасида биринчи ўринда туради. Уларнинг кўп учрашига аёл организмидаги ўзгаришлар сабаб бўлади. Уларга ҳайз функцияси билан боғлиқ ўзгаришлар, аборт ва туғруқ вақтида жинсий йўлларнинг зарарланиши асосий сабаб бўлади. Бундан ташқари ҳомиладорлик пайтида организмнинг касал туғдирувчи турли таъсирларга қаршилигининг камайишидан ҳам келиб чиқади.
Бачадон саратонини олдини олишнинг йўли аёлларимизни мунтазам равишда тиббий кўрикдан ўтказиб туриш. Илгари аёлларда бу касаллик 55 ёшдан кейин учраса, ҳозир умуман ёш танламай қўйди.
Масалан, бизнинг шифохонада тўрт фарзанднинг онаси, 1992 йилда туғилган ёш аёл даволанмоқда. Энг кичик боласи 5 ойлик. Ёш онанинг бундай хавфли касалликка чалиниши сабабини ўзингиз яхши билиб турибсиз.
Энг биринчи сабаб – эрта турмушга чиққанлиги, кетма-кет ҳомиладорлик, туғиш вақтида, ундан кейин ҳеч қандай тиббий кўрикдан ўтмаган, гинеколог маслаҳатини олмаган, организмдаги камқонлик, айтаверсак, сабаблари жуда кўп. Энг кекса аёл 80 ёшда. Унинг бу касалликка чалиниши сабаби, энг охирги фарзандини туққандан кейин кўрикдан ўтмаган. Ёшлигида бачадонида пайдо бўлга киста вақт ўтгандан кейин бачадон саратонига айланган. Эрта, индин, деб, вақтни чўзиш оқибатида ҳозир улар кимётерапия усули билан даволанмоқда. Илгари ушбу даволаш масканида йилига 45-50 аёл бачадон саратони билан даволанган бўлса, ҳозирги кунда уларнинг сони 200 нафарга етмоқда.
– Бачадон миомаси ҳақида гапириб берсангиз...
– Бачадон миомаси кенг тарқалган касаллик бўлиб, бизга мурожаат қилаётган беморларнинг 10-30 фоизида, 30 ёшга етган беморларнинг 20 фоизида,
40 ёшдан ошган беморларнинг 40 фоизида учрайди. Олимлар бачадон миомасининг келиб чиқиш сабаблари ва ривожланиши юзасидан ҳар хил фикрлар билдирган, лекин ягона хулосага келинмаган.
– Саратоннинг олдини олиш бўйича қандай профилактика чоралари кўрилмоқда?
– Аёлларда кўп учрайдиган бачадон саратони бачадондаги сурункали касалликлар – эрозия, полип ва оқ доғлардан пайдо бўлади. Касаллик ҳеч қандай белгисиз кечади. Кейинчалик авж олгач, ҳайз цикли бузилади, қон кетади ва ниҳоят, оғриқ пайдо бўлади. Шунинг учун ҳар бир аёл бир йилда икки марта скрининг кўригидан ўтиб туриши шарт. Қандли диабети бор аёлларда бу касалликнинг тузалиб кетиши қийин бўлади.
Организмда метастазлар ишлаб кетадиган бўлса, ички органлардаги жигар, талоқ, ўпка, юракда тўқималар “қўзғолон”и пайдо бўлади. Организмда моддалар алмашинуви бузилгандан кейин ўсма энг нозик жойга ўрнашиб олиб, емира бошлайди ва шунинг натижасида саратон касаллиги келиб чиқади. Лейкоцитлар кўпайиб кетади. Касалликни даволагандан кўра, унинг олдини олган яхши. Саратон касаллигининг 5-10 фоизи наслдан-наслга ўтади. Унинг икки хил ҳаракати бор: ҳужайраларнинг аномал тарзда ўсиб бориши ва бошқа аъзоларга ҳам ўтиб бориши (метастаз). Дунёда 28 миллион одам саратон касаллиги билан курашади.
Нима бўлганда ҳам, тиббиёт ходимларининг айтишича, саратоннинг илк босқичларида даволана бошлаган беморларнинг 75-95 фоизи ушбу дарддан тўлиқ фориғ бўлиш имкониятига эга. Умуман олганда, жаҳон ҳамжамияти кейинги йилларда мазкур касалликка қарши курашга алоҳида эътибор қаратиб, бу борада қатор лойиҳаларни амалга оширмоқда.
Хулоса ўрнида шуни таъкидлаш лозимки, ҳар бир инсон ўз саломатлигига, энг аввало, ўзи масъулдир. Шундай экан, соғлом турмуш кечиришга, атрофдагилар ва ўзимизга нисбатан чидамлироқ бўлишга, ҳар бир кунимиз, дақиқамизни яхши ниятлар ва амаллар билан ўтказишга ҳаракат қилайлик. Ҳар биримиз ўз саломатлигимизга беэътибор бўлмасак, соғлом турмуш тарзига қатъий риоя қилсак, тез-тез шифокор назоратидан ўтиб турсак, бизга бундай дард ва касалликлар яқин йўламайди.