Түркістан облысы әкімдігі тарапынан Түркістан облыстық корпоративтік әлеуметтік даму қорының базасында «Түркістан» және «Шымкент» ӘКК, мемлекеттік қызметшілерді және Атамекен ҰКП қатыстыра отырып, эвакуациялық пункттерде орналасқан Арыс қаласының тұрғындарына азық-түлікпен көмек көрсету жөнінде Штаб құрылған.

Ауқымды қайырымдылық акциясы аясында Қазақстандағы барлық облыстық әкімдіктер, қоғамдық бірлестіктер, түрлі қауымдастықтар, қарапайым тұрғындар мен фермерлерден Қордың қоймаларына азық-түлік өнімдері, гигиеналық заттар, балалар тағамы, көрпе-төсек, жалпы көлемі 150 тонна зат жиналды.

Тауарлар Қарағанды, Жамбыл, Қызылорда, Ақтөбе, Батыс Қазақстан, Алматы облыстары мен Алматы және Шымкент қалаларынан жеткізілді. Қайырымдылық көмекпен тұрмыстық қажеттегі бірінші заттар үлкен көлемде  әкелінуде. Соның нәтижесінде Штаб 75 эвакуациялық пунктен (тіркелгендер саны – 45845 адам, оның ішінде 4034 балалар, бұл пунктерде қазір 13187 адам тұрып жатыр) 33200 адамды қамтыған 44 өтінімді қабылдап үлгерді. Қалған пунктердегі қажеттіліктер жергілікті әкімдік, арнайы қызмет және тұрғындар тарапынан қамтамасыз етілуде.

Тапсырыстар бойынша 20 тонна азық-түлік, жүздеген атаумен тұрмыстық заттар, киім-кешек, химиялық және жеке гигиеналық және басқа да қажеттіліктер таратылды.

Әрбір эвакуациялық пункте жергілікті атқарушы орган, ӘКК, Атамекен, еріктілер мен көмектесуге келген қарапайым азаматтардан өкілдер жұмыс істеуде.