27 июндаги маълумотларга кўра, Арис шаҳридаги фавқулодда ҳолат оқибатларини бартараф қилиш учун ҚР ИИВнинг шахсий таркибидан 1488 ходим ва 189та техника сафарбар қилинди.

Мудофаа вазирлигининг сапёрлик қисмларидан 43 гуруҳ таркибида 408 жангчи Арис шаҳрини, темирйўл станциясини ва кўчаларни тозалади. Шунингдек, ҳарбий қисм ҳудудини портламай қолган ўқ-дорилардан тозалаш ишлари давом этмоқда. Олиб борилган ишлар натижасида 5700дан зиёд ҳарбий снаряд топилиб, улар махсус техникада кўчиришга тайёрлаб қўйилди. 

Эвакуация пунктларига 13187 одам жойлаштирилди. Жумладан, Шимкент шаҳрида – 7249, Туркистон вилоятининг туман ва шаҳарларида 5938 киши.

Тезкор штабларда ишон телефонлари ташкил қилиниб, уларга 15927 марта қўнғироқ бўлган.

Туркистон вилоят соғликни сақлаш бошқармасининг маълумотига кўра, 277 фуқаро тиббий ёрдам сўраб мурожаат қилган, 74 нафари эса шифохонага ётқизилган. 3 киши ҳалок бўлган.

Хуллас, махсус техника ёрдамида Арис шаҳрининг 16та участкасидаги барча кўчалар, 11 чақирим темирйўл портловчи моддалардан тозаланди. Мудофаа вазирлиги билан биргаликда хусусий ва кўпқаватли уйлар атрофи ҳам тозаланди. Ҳозир Арисда аҳвол барқарорлашган.