Жамиятимизда кенг тарқалган диний ёт оқимлардан бири – салафизм. Аҳоли учун хавфли бўлган бу диний оқимнинг етакчиси Дилмурод Маҳаммадов ҳақида нималарни биламиз? Ўзини салафий деб атаган Дилмурод ким? У нималарни даъват қилиб, кимларнинг онгини заҳарлади? Қамоқхонада Дилмурод ўз диний қарашларидан воз кечдими? Бу саволларга Kazislam.kz сайтининг мухбири билан бўлган суҳбатда Павлодар вилоят конфессиялараро муносабатларни ривожлантириш ва таҳлил қилиш Марказининг директори Гулназ Мақсутқизи Раздиқова жавоб берди.
– Гулнар Мақсутқизи, ўтган йили кузда экстремизмни ташвиқот қилган, салафийликка даъват этган бир неча фуқаро Қозоғистонга депортация қилингани маълум. Улар билан қандай ишлар олиб борилмоқда? Радикал оқимни тарғиб қилган салафийларнинг ўзлари бугунги кунда ўз диний эътиқодларини ўзгартиришдими?
– Ҳа, ўтган йилнинг кузи ва 2019 йилнинг баҳор ойларида ёт оқим вакилларига қарши кураш борасида салмоқли ишлар амалга оширилди. Жумладан, Туркистон вилояти ва Шимкент шаҳридаги бузуқ оқим таъсирига берилган фуқаролар ва уларнинг етакчилари судланди. Ушбу ҳудудда салафийликни тарғиб қилган етакчилардан Ўктам Заурбеков, Пўлат Муҳиддин ва Дилмурод Маҳаммадовлар жиноий жавобгарликка тортилди. Айни пайтда улардан иккитаси мамлакатимиздаги ахлоқ тузатиш маҳкамасида, биттаси эса шартли муддат билан жазосини ўтамоқда. Диншунос мутахассислар ва руҳшунослар улар билан реабилитация ишларини юритишмоқда. Менга касбим тақозоси билан Қозоғистондаги салафийларнинг уч раҳбари билан ишлашга тўғри келганини алоҳида қайд этаман. Қолаверса, мендан бўлак, улар билан Шимкент шаҳрининг диний ишлар бўйича бошқармаси мутахассислари ҳам доимий равишда ишлашмоқда. Шуни таъкидлаш жоизки, қанча меҳнат қилинмасин, барибир, натижалар кўнгилдагидек эмас. Сабаби, уларнинг тафаккурига ноанъанавий оқим таъсири шу қадар сингиб кетганки, бундан биратўла қутулиш осон эмас. Билишимча, бу каби одамлар салафийлик ғояларидан ҳеч қачон кечиб кета олмайди. Бугунги кундаги асосий масала – уларни жамиятимизга ва қозоғистонча ўзига хос хусусиятларга мослаштириш зарур.
– Ижтимоий тармоқларда айрим фуқароларнинг фикрига кўра, ушбу дин етакчилари жамият учун ҳеч қандай хавф-хатар туғдирмаган, улар салафийлик ғояларини мўътадиллик билан етказишга уринган экан.
– Юқорида номлари зикр этилган етакчилар ўз маърузаларини Интернет орқали, хусусан салафийчилар орасида кенг тарқатишгани маълум. Уларнинг ҳаммаси ўзларини Қозоғистонда салафийликнинг мўътадил тарғиботи даъватчиси сифатида таништирган. Аслида-чи? Келажакда қозоқ халқининг миллийлигига, ўзлигига хавф туғдириши муқаррар. Хусусан, улар қозоқ халқининг мусулмончилик йўлида шаклланган тажрибаси ва ўзига хос тарихий йўлини тан олишмайди. Масалан, мамлакатимиздаги барча террорчилик ҳаракатлари радикал салафий оқимининг вакиллари томонидан содир этилганини ҳам унутмаслик керак. Яширишнинг ҳожати йўқ, Сурияга урушга отланган қозоғистонликларнинг ҳаммаси ушбу оқим аъзолари.
– Яқиндагина сиз салафийлик оқимининг етакчиси Дилмурод Маҳаммадов билан иш олиб бордингиз. Дилмурод қандай қилиб салафийларга раҳбар бўлиб қолди?
– Дилмурод Маҳаммадов – этник ўзбек, Жанубий Қозоғистон вилоятида туғилган. Диншунослик ихтисослиги бўйича олий маълумот эгаси. Бир неча тилларда эркин сўзлаша олади. Икки марта уйланган, 9 нафар фарзанди бор. 20 йилдан зиёд Саудия Арабистонида яшаган. Олий маълумотни ҳам шу мамлакатда олган. Маълумки, 2000 йилларнинг бошларида давлатимиздан диний билим олиш ниятида кўплаган ёшларимиз хорижга чиқарилди. Тан олиш керак, ўша пайтларда Саудия Арабистонидаги талабаларнинг ўқишига зарур шарт-шароитлар бизникидан анча олдинда эди, албатта. Саудия Арабистони Қироллиги биздан борган “толиблар”га нафақат таълим, балки ётоқхона, иссиқ овқат, ҳатто уйига самолётда учиб бориб-келиши учун чиптасигача олиб берар эди. Бу етмагандек, яна йилда бир марта Маккага ҳожиликка бепул боришларига ҳам имкон яратган эди. Арабистонда диний билим оладиган фуқароларга 150-200 доллардан ҳар ойда стипендия тўланарди. Сўнгги ўн йил ичида талабаларга ўз юртидан оиласини кўчириб келишига ҳам рухсат берилган. Албатта, бундай шароитларга эга бўлган Саудия Арабистони билан Қозоғистондаги диний даргоҳларнинг шароитларини таққослаб бўлмайди. Ёшларимиз Арабистон тавсия этган имкониятлардан фойдаланиб, диний билим олиш учун шу юртга кўпроқ бора бошлади. Минг таассуфки, бўлажак “юлдузли диндорлар” ўзлари ўқиган юртнинг диний оқимлари таъсирига тушиб қолишди. Нафақат ўзлари, балки интернет орқали эл-юртимизга ёт бўлган оқим ғояларини даъват қилиб, ўз сафларини фаоллик билан тўлдиришга киришишди.
– Ушбу диний оқим ва унинг етакчиларининг маърузалари, ваъз-насиҳатларини тинглаб, жабр кўрган аниқ шахслар борми?Дилмуроднинг адашганлигини исботловчи далиллар етарлими?
– Бугунги кунда Дилмуроднинг ваъз-насиҳатларини тинглаб, экстремистик жиноятларга қўл урган 20 фуқаро судланганлигини тергов аниқлади. Шу билан бир қаторда, амалдаги қонун-қоидаларимизга зид бўлган дунёқарашга эга гуруҳлар шакллангани маълум. Масалан, салафийларнинг тарафдорлари қозоқ миллатининг фуқаролик, миллий хусусиятларини тан олишмайди, аксинча бундай тушунчаларга мутлақо қарши. Айнан мана шу хислат бузуқ оқим вакилларининг асосий белгилари бўлиб ҳисобланади. Оқим аъзолари ушбу тушунчаларга маҳкам таяниб, давлат, жамоатчилик ишларига умуман аралашмайди, мусулмон умматидан ўзларини тортиб туришади, ўзларидан бошқаларнинг диний мафкурасини қабул қилишмайди. Шу тариқа мусулмонларнинг жамиятдан ажралиб қолган гуруҳига айланишади.
– Қамоқхонада Дилмурод нима ишлар қилди, кимларни ўз ғояларига даъват этди? Бунга мисоллар келтира оласизми?
– Қозоғистон Прокуратурасининг расмий сайтида Дилмуроднинг маърузалари ва материалларининг диний хулосаси эълон қилинган. Малакали мутахассислар бу материаллар жамиятда миллатлараро, динлараро норозиликни келтириб чиқаришга йўналтирилган, экстремистик руҳда деб тан олишди. Дилмуроднинг ўз мухлисларига айтган даъватларидан бир нечтасини мисол тариқасида келтирай: “Нафратланиш керак бўлса, насронийлардан нафратланиш керак. Яҳудийлардан эса насронийлардан ҳам кўпроқ нафратланиш лозим. Тарихда яҳудийлар пайғамбарларни ўлдиргани маълум. Шу боисдан улардан қаттиқ нафратланиш керак”. Кўриб турганимиздек, шу маърузанинг ўзиёқ тингловчиларни ўзга миллат ва дин вакилларига нисбатан хайрихоҳликда бўлмасликка чақиради. Хусусан, Интернетда Дилмуроднинг маърузалари ичида бошқа дин ёки миллат вакилларига, масалан, насронийлар, яҳудийлар, сўфийлар, шиалар эътиқодига нисбатан шубҳали қарашларини ифодаловчи даъватлари борлиги аниқланди. Бундан ташқари, бенамоз одамларга “бидъатчилар”, “адашганлар”, “яҳудийлар ва насронийларнинг тарафдорлари”, “намоз ўқимайдиганлар – гуноҳкорлар” деган айбларни қўяди. Дилмурод диний китоблардан келтирилган парчалар, манбалар орқали тингловчилар онгида кимларни ёмон кўриш кераклиги ҳиссини шакллантиради. Шунингдек, Дилмурод ўз мухлисларини, яъни ўзларини салафийлар деб атайдиганларга “ҳанафий-мотуридийлар” эътиқодидагилар билан ёки Исломнинг бошқа оқимлари вакиллари билан никоҳ ўқимаслик ҳақида турли хил ғояларни сингдирган. Буларнинг ҳаммаси яна бир карра Дилмуроднинг ақидавий ғоялари жамият бирлигига рахна солаётганини далиллайди.
– Дилмурод танлаган йўли хато эканлигини англадими? Ўзининг ноқонуний фаолиятини қандай изоҳлайди?
– Дилмурод ўз хатосини очиқ тан олмайди. Қолаверса, ўз тарафдорларининг муносабатидан, яъни уни “дин йўлида азоб чеккан қаҳрамон” сифатида таърифлашларидан иродаси букилмай, тутқунликдаги қийинчиликларга мардона, чидам билан дош бермоқда. Бундан аввалги суҳбатда айтиб ўтганимдек, “харизматик раҳбар” синдроми мавжудлиги аён. Табиийки, мазҳабсиз салафийларнинг вакиллари худди шундай иқтидорли ва ўзгача фикрлаш қобилиятига эга. Лекин бу тоифадаги одамлардан ғурурланишнинг ҳеч кераги йўқ. Чунки ёт оқим етакчилари нафақат ўзларини, балки бошқа минглаган одамларни ҳам тўғри йўлдан адаштириб, ақидаларини ўзгартиришга қодир. Дилмурод бунга қандай эришди? Дилмурод ҳам бошқа оқимларнинг раҳнамолари сингари хорижга диний билим олгани кетиб, ўзлаштирган юзаки билимларини Саудия Арабистонида бошқалар билан баҳам кўра бошлайди. Ўша пайтда, кўпчилик Саудия Арабистонидаги асосий дин ваҳҳобийлик эканини билмаган эди. Шу тариқа қозоғистонликлар салафийлар йўлига эмас, балки салафийлик-ваҳҳобийлик оқими таъсирига тушиб бораётганини ўзлари ҳам сезмай қолишди. “Ҳаммасини биладиган устоз” деган номга эга бўлган оқим етакчилари мамлакатимиздаги масжид имомларининг ваъз-насиҳатлари ва фатволарини йўққа чиқариб, ўз ақидавий ғояларини илгари сура бошлашди. Шу тарзда атрофига ўзига ўхшаб фикрловчи тарафдорларини тўплаб, “ҳаммасини биладиган устозлар” дан “раҳнамо”ларга айланишди. “Устозлар” ўзларини “шайхлар”га ўхшатиб, уларнинг йўлидан юриб, атрофидаги мухлислари онгига ўзларининг қарама-қарши амалий ва ақидавий қарашларини сингдира бошлашди. Кейинчалик Ислом динини ниқоб қилиб, ноқонуний тадбирларга чиқиб, тажовузкорлик ҳаракатларини амалга оширишди. Ваҳоланки, ёт оқимларнинг етакчилари ўзлари тузган давралардан ўзлари чиқа олмай қолишди. Масалан, Дилмуродда турли оқим ва ҳизбларни бирлаштирувчи куч мужассам, харизматик етакчилик қобилияти мавжуд. Шунингдек, унинг шахсиятида ўзига бино қўйишлик, ишонувчанлик, мустақил ирода, таваккалчилик, тез ўзгарувчанлик, актёрлик, ўз ғояларига бўйсундира олиш ҳисси жуда кучли.
– Нима учун Дилмурод ўз диний таълимотини кўп йиллар давомида интернет орқали қозоғистонликлар онгига сингдириб келишига йўл қўйилди? Нима учун унинг фаолияти тўхтатилмади?
– Сабаби, бошқа ёт оқимларнинг етакчилари каби Дилмурод Маҳаммадов ҳам 20 йилча Қозоғистонда яшамади. У Қозоғистон жамиятидан узоқда бўлди, қонунларимиздан бехабар эди. Қозоғистонда рўй бераётган жараёнлардан бехабар қолса-да, ўзларини салафийлар деб атайдиган “кўр тақлидчилари”га аниқ йўл-йўриқлар, дарслар ва фатволар берарди. Табиийки, Дилмурод ўтган йиллар мобайнида диндорларимизнинг эътиқоди кучайгани, диний саводхонлиги ошгани ҳақида билмаслиги мумкин. Мамлакатимизнинг диний ишлар бўйича олиб бораётган сиёсати ҳам ривожланиб, Муфтият ходимларининг билим даражаси юксалди. Дилмурод билан бўлган суҳбатдан маълум бўлишича, у дунёвийлик тамойилларини мутлақо инкор этади. У Қозоғистон жамиятидаги маънавий қадриятлар, яъни бағрикенглик, динлараро ва миллатлараро тотувлик ва дўстлик ҳақидаги тушунчаларга оид тасаввурга ҳам эга эмас.
– Дилмурод, ўзи туфайли қанча ёшлар азият чекканидан пушаймонми?
– Шуни таъкидлаш жоизки, Дилмурод Маҳаммадов ўз ихтиёри билан ўзига оғир юкни олди. Ҳеч ким, на расмий ҳокимият, на Қозоғистоннинг диний бошқармаси унга қозоғистонлик ёшларга диний билим ўргат, даъватлар қил деб мурожаат қилди. Уни бундай қилишга на ахлоқий, на ҳуқуқий ҳуқуқлари бор эди. Ваҳоланки, юртимизда диний билимни тарқатишга мўлжалланган расмий ахборий телеканаллар мавжуд. Лекин, шунга қарамасдан сохта дин етакчилари зиммаларига шу қадар кўп нарсани олишиб, қозоғистонликларнинг диний саводхонлигини оширамиз, деб ўз таълимоти йўлида ўзлари қурбон бўлишмоқда. Дилмурод ҳам ноисломий ўқув даргоҳида таҳсил олиб, ўз олдига одамлар оқимини эргаштиришни мақсад қилиб, раҳнамолик вазифасини зиммасига олди. Ёт оқимга хос билимларни теран ўзлаштирган Дилмурод ўзини раҳнамо санаб, бошқаларни ўз манфаатлари йўлида хизмат қилдира олди. Балки, у ўз тарафдорларини урушда қатнашишга ёки сохта ҳожиликка очиқ даъват қилмаган бўлиши мумкин. Лекин унинг ва бошқа раҳбарларнинг ваъз-насиҳатларини тинглаган кўпгина ёшлар Сурияга жиҳод дея урушга отланишди, сохта салафийларга айланишди. “Халифат” қуриш ғояси билан руҳи тетиклашганлар Қозоғистондан воз кечиб, уни “кофирлар мамлакати” деб аташди, Сурияга эса “Соф Ислом” учун курашишга отланишди. Уларнинг аксарияти уруш майдонларидан қайтмади, қанчаси ўша ёқларда қолиб кетгани ҳам номаълум. Энг афсусланарлиси, бу йўлда ўз ота-оналари томонидан олиб чиқиб кетилган бегуноҳ болалар ҳам ҳалок бўлишди. Ҳозир юртимизга қайтариб келтирилган ўша фуқаролар террорчилик ва экстремизмни тарғибот-ташвиқот қилгани учун жиноий жазоларини ўтамоқда. Улардан нима учун Сурияга бординглар, деб сўрасак, аввало, Дилмуроддан эшитган даъватларини айтишади. Демак, агар улар Дилмуроднинг ваъзларини тингламаганда, эҳтимол салафий ҳам, экстремист ҳам бўлмаган бўларди. Яна ким билади, дейсиз. Ҳозир Дилмуроднинг айби тақдирлари барбод бўлган ёшлар туфайли маълум бўлиб турибди. Балки уни тўғридан-тўғри айбдор деб аташ ҳам ўринлимасдир, лекин барибир бевосита унинг таъсири катта бўлгани исботланган ҳақиқат. “Ортингиздан эргашган тарафдорларингиз бошига тушган ишларда ўзингизни айбли санайсизми?”деб савол берганимда, унинг жавоби шундай бўлди: “Мен ахир ҳеч кимни мажбурлаганим йўқ, ҳар ким ўз ихтиёри билан даъватларимни тинглаган”.
Нима учун унда у ижтимоий тармоқларда фаол ишлади, ўз роликларини яратди? Эндиликда эса ўз айбини шогирдларига ағдариб, ўзидан масъулиятни соқит этмоқда. Ахир, экстремистик ҳаракатларга олиб келадиган ёки алоқадор чора-тадбирларнинг ҳаммаси жазоланади, бу давлатимизнинг нуқтаи назари-ку. Айтганча, суҳбатимиз сўнггида ижобий жиҳатлар ҳам намоён бўлди.
“Эҳтимол, мен туфайли ҳозир кўплаб йигитлар қамоқхоналарнинг маҳбусларига айланишгандир. Балки Аллоҳ оналарнинг қарғишларини эшитгандир, шу сабабли мен ҳам шу ердаман”, деди Дилмурод.
– Суҳбатимиз сўнггида Дилмуроднинг тарафдорларига, яъни уни шу кунга қадар бегуноҳ деб ҳисоблаётган, унинг маърузаларини жон-дили билан тинглаётганларга нималарни етказган бўлардингиз?
– Менимча, Қозоғистонда салафийлик оқими аъзолари ўз етакчиларининг қамалганларига қараб, тегишли хулоса чиқаришлари зарур. “Жусан” тадбири туфайли қозоғистонликларни жанговар ҳаракатлар содир этилаётган ҳудудлардан қайтариб олиб келиниши ҳар бир салафийни ўйлантириши керак. Салафийликнинг экстремистик ғояларига чек қўйилиб, жамиятга қарши зиддиятларни тўхтатиш шарт. Салафийлар мамлакатимизнинг миллий қадриятларига хавф-хатар туғдирмаслиги, давлат билан уйғунликда яшаб, миллий урф-одатлар ва анъаналарни ҳурмат қилишлари тақозо этилади. Реабилитация марказларининг мутахассислари, масжид имомлари уларга ҳар доим ёрдам беришга тайёр. Анъанавий Ислом эътиқодидаги мусулмонлар адашганларни кечириб, Қозоғистонда ягона мусулмон уммати бўлиб яшашга тайёр. Экстремизм ва терроризм учун жазоларини ўтаётган йигитлар эртами-кечми, қамоқхоналардан чиқади. Бугунги кунда бизнинг вазифамиз – улар тафаккурига миллий қадриятларимизни сингдириш, фаол фуқаролик нуқтаи назарни ўзлаштиришга ёрдамлашишдир. Ва уларнинг жамиятда ўз ўрнини топиб, зиддият-тўқнашувларсиз яшаб кетиши, энг аввало, улар билан иш олиб борадиган теологлар, руҳшунослар зиммасидаги юкдир.
– Суҳбат учун раҳмат, Гулназ Мақсутқизи!