ҚР Бош вазирининг ўринбосари Женис Қасимбек хизмат сафари билан Арис шаҳрига келди. 

Дастлаб у Атиров вилоятига қарашли 1-шўъбадаги қурилиш-таъмирлаш ишлари билан танишди. Ушбу ҳудудда 482та уй жойлашган. Зарар кўрган 431 уйнинг ҳозирги кунда учтаси тўлиқ таъмирланган. “BI Group” компанияси ушбу шўъбадаги 88та уйни аслига келтириш ишларини йўлга қўйган.

Сўнг ишчи гуруҳ Нур-Султан шаҳрига қарашли 9-шўъбада бўлишди. Уларда 655та уй бор. Ҳудудда аслига келтирилиши лозим 572та бошпананинг 105тасида қурилиш тўлиғи билан поёнига етган.

Шунингдек, Ҳукумат раҳбарининг ўринбосари 1904 йили пойдевори тикланган “Арис-1” темирйўл вокзалида бўлди. Бу ердаги ишлар “Samruk-Kazyna Construction” ҲЖга тегишли. Бошқарма раисининг биринчи ўринбосари Арман Жетписбаев зиммадаги ишлар тўлиқ вақтида амалга оширилаётганини маълум қилди.

Навбатдаги объект Шимкент шаҳрига қарашли 10-шўъба. Уларнинг қарамоғида 652та уй бор. Таъмирталаб 604 уйнинг 138тасида ишлар якунланган. Шундай кейин ишчи гуруҳ шаҳар шифохонаси ва марказий стадиондаги таъмирлаш ишларини кузатишди. Хизмат сафари якунида Нур-Султан, Ақмўла, Қўстанай шаҳарларига топширилган шўъбалардаги ишлар ҳам кўздан кечирилди.

Арис шаҳрининг бугунги аҳволи билан танишган Женис Қасимбек шаҳарни аслига келтириш юзасидан қурилиш-таъмирлаш ишларини жадаллаштириш лозимлигини топширди.