Таҳририятга мурожаат қилган Нодира беш болали она, кенжатой ўғлини туғиб, уйда бола парвариши билан банд. Турмуш ўртоғи ижарага олган машинасида киракашлик қилиб, кун кечиради. Оилада пулга муҳтожлик шундоққина сезилиб турибди...
Маълумки, Қозоғистонда камбағалликнинг барча шаклларига барҳам бериш мақсадида Давлат раҳбари, Ҳукумат янги-янги ижтимоий чора-тадбирларни ўйлаб топмоқда. Шу йил баҳорда ёрдамга муҳтож оилаларни моддий жиҳатдан қўллаб-қувватлаш мақсадида янги қонун меъёрлари қабулланиб, оддий халқ ёппасига шу ўзгаришлар таъсирида қолгани рост.
Нодира ҳам бу янгиликни эшитар-эшитмас, ҳужжат тўғрилаш илинжида ҳафталаб чопиб, ҳолдан тойди. Кичкинтойини қўшнилариникига ташлаб, ҳа деса, аҳолига хизмат кўрсатиш маркази томон югураверди. Шимкент шаҳар Ал Форобий туман аҳолига хизмат кўрсатиш маркази апрель ойидаги тиқилинчлардан ҳамон “ўзига келолмаётган” бўлса, ажабмас. Эрталабки соат 6.00дан кўп болали оналар марказ томон оқиб келар, ҳамма навбат олишга ошиқар эди.
Нодира аёллар орасига суқилиб кириб, “ким охирги” эканлигини сўради. Негадир навбат охири кўринмас, аёлларнинг бақир-чақири атрофни тутган эди. Соат 9.00да марказ эшиги очилар-очилмас, ҳамма ўзини ичкарига урди. Ёш оналар эмизикли чақалоқларини кўтариб, ҳаммадан олдин ичкарига киришни истарди. Эрталабки иш вақти бошланишининг ўзида 200га яқин аёл навбатда турган, уларнинг ҳаммасига хизмат кўрсатилиши лозим эди. Нодира умри бино бўлиб, бунақанги тўполонни кўрмаганиданми, бақир-чақирлардан кўнгли айний бошлади. Беш-олти соатлик асаббузарликлардан сўнг, ниҳоят навбати келиб, “табло”да унинг рақами “порлади”...
Икки ҳафта шу тарзда ўтди. Қандайдир қоғозларни тўлдиравериб, кимларгадир тасдиқлатавериб, обдон чарчади. Бироқ, одамлардан эшитгани, “давлатнинг даста-даста пуллари” кўз олдида гавдалангани сайин чарчоқларини унутарди.
Кўп болали оналарга апрель ойидан янги тартибда манзилли ижтимоий ёрдам берилиши ҳақида кўп айтилди, ёзилди. Бу мавзу ҳали ҳам долзарб.
Нодира ҳам 2019 йилда қашшоқлик даражаси яшаш минимумининг 50дан 70 фоизга оширилгани, кўп болали оилаларнинг даромади шу кўрсаткичдан камроқ бўлса, яъни аввало оиланинг ҳар бир аъзосига ойига 14849 тенгедан тўғри келган бўлса, апрель ойидан бошлаб кўпайтирилган миқдордаги манзилли ижтимоий ёрдам – ҳар болага 20789 тенгедан берилишини билиб олди.
Янги қоидалар бўйича болаларнинг стипендияси, ногиронлик бўйича нафақаси ва бошқа давлатдан олинадиган ёрдам пуллари инобатга олинмаслиги, ҳар болага 21 минг тенгедан ҳисобланиши, нафақат Нодирага, балки барчага ойдек аён бўлди. Фақат...
Фақат кимдир, ҳа шу юртнинг айрим одамлари, бой-бадавлат бўлса-да, давлатнинг бу мададидан четда қолишни истамади. Улар қонун-қоидаларни “айланиб ўтиб”, пора ёрдамида манзилли кўмакнинг мўмайгина қисмини олишга уриндилар.
Нодиранинг қўшниси, бадавлат тадбиркор хонадон эгалари ҳам ҳужжат тўғирлаб, одамини топиб: “Вой, ростдан ёрдам берасизми?, “Умрингиздан барака топинг”, дея манзилли ёрдамга “илиниб ҳам қолди”. Нодираларникига келган комиссия аъзолари ҳовлини, уйдаги хоналарни бирма-бир текширди...
Кўп болали хонадонда тақчиллик шундоққина кўзга ташланиб турар, болаларнинг кийим-бошлари, уй рўзғор буюмларининг эскилиги оилага қўшимча молиявий мадад зарурлигини англатарди. Лекин комиссиянинг бир вакили оилани тўқ деса, иккинчиси саранжом-сариштагина ҳовлини яқинда таъмирдан чиққан, деб ҳисоблади, хуллас, расман унга манзилли ёрдам раво кўрилмади.
Нодира “меҳмонлар”ни дарвозадан кузатар экан, аламидан лабини тишлаганча қолаверди. Вакиллар машинада бироз вақтгача ўтиришди, ниманидир гаплашишди, тортишишди, лекин дарров кетиб қолишмади. Тарвузи қўлтиғидан тушган аёл эса уйга кириб кўз ёшига зўр берилди.
“Ишларини” осонгина, пора йўли билан “хамирдан қил суғургандек” битириб олганлар даста-даста пулни қуртдек санаб, банкомат олдида шодон туришганда, Нодирага ўхшаш муҳтожлар болаларига қандай овқат пиширишни ўйлаб, газ плитаси олдида боши қотган эди.
Лекин “Қинғир ишнинг қийиғи қирқ йилдан кейин ҳам чиқади”, деган гап бекор айтилмаган, Ҳукумат ҳам анойи эмас. Жойларда ҳаддан ташқари янги “камбағаллар” кўпайгани, одамларга тахминдан ортиқ маблағ берилаётганидан хуноб бўлиб, қайта текширувлар уюштириб, барча манзилли ёрдам олувчиларни “элак”дан ўтказишга қарор қилди.
Шу кунларда бутун республикада оммавий текширувлар ташкил этилиб, минглаган қонунбузарликлар аниқланди.
Куни кеча Бош вазирнинг ўринбосари Гулшара Абдиқалиқова манзилли ёрдам олувчилар орасида икки қаватли ҳашаматли уйлар, савдо дўконлари ва “Жип” машиналарининг соҳиблари ҳам борлигини алоҳида қайд этди.
“Турли вилоятларда икки мингга яқин фактлар очилди. Катта текширувлар юритилмоқда. Янгилари яна фош этилиши мумкин. Албатта, айби ошкор бўлганларга олган пулларини қайтаришни буюряпмиз. Кимдир ихтиёрий равишда қайтармоқда, кимдир эса бериш ниятида эмас. Уларни ҳуқуқ-тартибот органларига топширмоқдамиз. Қолган ишларни органлар юритишади, кейин судга беришади. Олинган пуллар суд тартиби билан олинган пуллар ундирилади”.
Бош вазир ўринбосарининг айтишича, бугунги кунда мамлакатда 240 мингдан ортиқ оила манзилли ёрдам олмоқда, бу 1,4 миллион фуқаро демакдир. Уларга давлат хазинасидан 202,5 млрд. тенге ажратилади.
“Биз фирибгарлик, ҳужжатларни қалбакилаштириш, ноқонуний равишда нафақа тайинлаш ҳолатлари содир этилганига гувоҳ бўляпмиз. Афсуски, мамлакатда бирорта хайрли иш амалга ошириладиган бўлса, дарров бундан фойдаланиб, пул ишлаб қоладиган ёки мўмайгина давлат маблағини ўзлаштириб оладиган одамлар ҳам топилади.
Ахир, 105 минг тенге бир оила учун яхшигина ёрдам. Шу сабабли ҳар хил усулларни қўллаб кўришади, қаердадир даромадларини яширишади, устига-устак бу борада сохта ажралишлар ҳам кўпайиб кетди ва ҳоказо”, деди Бош вазир ўринбосари.
Дарвоқе, ҚР Меҳнат ва аҳолини ижтимоий муҳофаза қилиш вазирлигида давлатдан ёрдам пулини ноқонуний равишда олаётган фуқароларни топиш ва пулни қайтариш учун алоҳида ишчи гуруҳлари тузилди. Айни пайтда гуруҳларнинг дастлабки текширувлари якунланиб, материаллар тегишли жойларга берилди. Гуруҳ аъзолари манзилли ёрдам олувчиларнинг уйлари, бошқа мол-мулкларини суратга тушириб, ашёвий далил сифатида ҳуқуқ-тартибот органларига топширишди.
Бугунги кунда ҳам иш тўхтаб қолгани йўқ, жойларда текширувлар давом этмоқда. Минтақаларда ишлаётган комиссияларга фирибгарликка оид ишларнинг ҳаммасини ҳуқуқни муҳофаза қилиш органларига топшириш ҳақида алоҳида топшириқ берилган.