ҚР Бош вазири А. Мамин бошчилигида келган делегация Туркистондаги халқаро автовокзалнинг очилиш маросимида қатнашди.

Бош вазир А. Мамин ва вилоят ҳокими Ў. Шўкеевлар рамзий тасмани қирқиб, 2,4га майдонда барпо этилган шарқона намунадаги автовокзални очиб беришди. Бир кеча-кундузда 600 автобусни қабул қилиш ва чиқариш имконига эга катта иншоот ишга тушди.

Дарвоқе, ушбу автовокзалнинг қурилиши 2019 йил апрель ойида бошланган эди. Буюртмачи – “Қасиет­ТранзитСервис” МЧБ, пудратчи – “Югстройконструкция” МЧБ. Бир кечаю кундуз мобайнида 10 минг йўловчига хизмат кўрсатиш имконига эга автовокзал биносида кутиш зали, чипта сотиладиган кассалар, она ва бола хонаси, тамаддихона, дам олиш хонаси мавжуд. Бундан ташқари янги автовокзал ҳудудида автотураргоҳ, бекати, автобусларнинг техник кўригини ўтказиш ва назорат хонаси, шунингдек, ювиш жойини очиш режалаштирилган. 

Бу ердан Алмати, Нур-Султан каби шаҳарларга, вилоятнинг барча туманларига қатнов йўлга қўйилган.