Ҳамюртларимиз жаҳон бўйлаб кўплаб турли нуфузли мусобақаларда иштирок этиб, юртимиз, элимиз шаънини юксакларга кўтариб келаётганини баралла айта оламиз.

Шимкент шаҳрининг Сайрам даҳасида фаолият юритаётган 12-сонли спорт мактабининг ёш теннисчилари, таэквондочилари, пауэрлифтингчиларининг жаҳон бўйлаб эришиб келаётган муваффақиятлари ҳақида газеталаримиз саҳифаларида мунтазам ёритиб келяпмиз. Уларнинг сафига куни кеча Болгария пойтахти – София шаҳрида 2002 йилда туғилган ўғил болалар орасида эркин курашдан ўтган жаҳон биринчилигида кумуш медалга сазовор бўлган Жаҳонгир Аҳмаджонов ҳам қўшилди. У Шимкентнинг Абдуллаобод даҳасидан, 12-сонли спорт мактабининг эркин курашдан тарбияланувчиси (устози Ғуломжон Нурметов).

Болгарияда ўтган Жаҳон чемпионатида Қозоғистон терма жамоаси сафида 51 кг. вазнда гиламга тўрт бор чиқиб, чемпионатнинг кумуш медалини қўлга киритди. 

Ёш, ҳамюрт полвонимизни улкан ютуғи билан табриклаш мақсадида 12-сонли спорт мактабида устозлар ва тарбияланувчилар иштирокида Жаҳонгир Аҳмаджоновни кутиб олиш маросими ўтди. Тадбирда унинг отаси Фурқат ака ва устози Аблай Рисбеков ҳам иштирок этди. Тантанани қутлов сўзлари билан спорт мактаби директори Ҳасан Маҳкамбоев очиб, спортчимизни ва устозларни улкан ютуқ билан муборакбод этди. 

Жаҳонгир ҳам тадбир қатнашчиларига миннатдорчилик билдириб, чемпионат таассуротлари билан ўртоқлашди. 

Шу кунларда Жаҳонгир Шимкент шаҳридаги иқтидорли болалар спорт интернатида тажрибали устоз-мураббийлар қўлида кураш билан шуғулланишни давом эттириб, бўлажак мусобақаларга тайёргарлик кўрмоқда.