Давлат раҳбари Марказий Осиё давлатларининг Ташқи ишлар вазирлари билан учрашди

Пойтахтда ҚР Президенти Қасим-Жўмарт Тўқаев “С5+1”шаклидаги олий даражадаги учрашувда иштирок этиш учун Нур-Султанга келган Ўзбекистон Республикаси Ташқи ишлар вазири Абдулазиз Комилов, Қирғизистон Республикаси Ташқи ишлар вазири Чингиз Айдарбеков, Тожикистон Республикаси Ташқи ишлар вазири Сирожиддин Муҳриддин, Туркманистон Республикаси Ташқи ишлар вазири Рашид Мередов билан учрашди.

Давлат раҳбари дипломатларни АҚШ билан минтақавий ҳамкорлик ва муносабатларни мустаҳкамлашнинг самарали механизми бўлмиш “С5+1” шаклидаги навбатдаги учрашувнинг муваффақиятли якунлангани билан табриклади.

Қ. Тўқаев Марказий Осиё давлатлари орасидаги интеграциявий жараёнларни янада ривожлантиришнинг муҳимлигини таъкидлади.

– Кўп асрлик умумий тарихимиз, тотув қўшничилик, маданий ҳамда диний биродарлигимиз давлатларимизни яқинлаштирадиган асосий омил бўлган ҳамда ҳар қачон шундай қолаверади. Қозоғистоннинг Тўнғич Президенти – Элбоши Нурсултан Назарбаевнинг ғайрат-жижоати туфайли Марказий Осиёдаги ҳамкорлик ташқи сиёсатимизда ҳар доим устуворликка эга бўлди, – деди Давлат раҳбари.

Қасим-Жўмарт Тўқаев минтақа ичидаги савдо-сотиқ, инвестициявий, транспорт ҳамда маданий-гуманитар муносабатларни ривожлантириш масалаларига тўхталди.

Давлат раҳбари 2018 йил март ойида Қозоғистон пойтахтида ўтган Марказий Осиё давлатлари раҳбарларининг илк Маслаҳат учрашувида эришилган битимларни амалга оширишнинг муҳимлигини таъкидлади.

– Бу воқеалар мамлакатларимиз орасидаги муносабатларнинг янги даврига йўл очди, десак, муболаға бўлмас. Минтақа ичидаги савдо-сотиқ даражасининг сезиларли ортиши бунга аниқ далил бўла олади, – деди Қозоғистон Президенти.