Давлатимиз учун аҳамияти муҳим “Болашақ энергиясы” лойиҳасини томоша қилишга Жанубий Қозоғистон вилоятидан борадиган 4 мингга яқин ўқувчидан дастлабки туркуми Шимкент шаҳридан йўлга отланди.

Буюк дашт тўрида ўтаётган халқаро ихтисослаштирилган кўргазмада Zhana Talap туристик агентлиги ташкиллаштирган 4 кунлик турга дастлабки 150 ўқувчи кетди. Уларни Шимкент шаҳар темир йўл вокзалидан шаҳар таълим бўлими раҳбари Жанат Тажиева билан ота-оналари, устозлари ва дўстлари кузатиб қолишди. Кузатиш маросимида миллий асбоблар оркестри жўрлигида ўқувчилар саройининг бадиий ҳаваскорлик жамоаси хайрлашув қўшиғини ижро этди. “Алтын ғасыр” гуруҳи ижросида “Аман қала – Астана” қўшиғи янгради. 

Тадбир якунида шаҳар мактаблари ўқувчилари иштирокида “ЭКСПО. Арманға сапар” флешмоби уюштирилиб, осмонга шарлар учирилди. Минтақадаги ижтимоий жиҳатдан кам таъминланган оилаларнинг болалари ҳамда ўқишда илғор, жамоат ишларида фаол, билими ва намунали тартиби билан кўзга тушган 3750 ўқувчига давлат ва ҳомийлар ҳисобидан кўргазмага йўлланма берилган эди.