Муҳтарам Президентимизнинг халққа йўллаган илк Мактубидан ўрин олган: “Еримиз хорижликларга сотилмайди. Бунга йўл қўйилмайди. Бироқ ердан самарали фойдаланилишини таъминлаш – бизнинг вазифамиз” деган сўзлари менга манзур бўлди. Ер – Қозоғистон халқининг бебаҳо бойлиги. Уни асраб-авайлаш ва ундан унумли фойдаланиш, келажак авлодга муносиб етказиш ҳар биримиз учун долзарб масала. 

Мактубда тўхтаб ўтилган яна бир ҳолат, яъни браконьерларга нисбатан жазони қатъийлаштириш масаласига ҳам қўшиламан. Сабаби, юртимизда рўй берган фожиа кенг жамоатчиликни жунбушга келтирди ва раҳбариятдан муносиб қарор қабул қилишни тақозо этаётган эди. Дарҳақиқат, Қозоғистондаги она табиат муҳофазаси, авваламбор, браконьерлар билан аёвсиз курашиш зарурлигини билдиради. Президент браконьерларни уюшган жиноятчилик вакиллари деб ҳисоблаб, Ҳукуматга икки ой ичида тегишли қонунчиликни қатъийлаштириш юзасидан чоралар кўришни топширди.

 Мактубда кўтарилган яна бир долзарб масала – болаларга нисбатан жиноят, жинсий зўравонлик, педофилия, гиёҳванд моддалар тарқатиш, одам савдоси каби оғир жиноятларга жазо турларини кучайтириш ишини тезлаштиришга даъват ҳам кенг жамоатчиликнинг кўпдан кутган саволларига жавоб бўла олади, деб ўйлайман.