Минтақа раҳбари Ў. Шўкеев хизмат сафарини Жаушиқум қишлоқ округидаги полиз маҳсулотлари етиштирадиган “Турар” деҳқон хўжалигини оралашдан бошлади. Хўжалик ўз даласида даставвал тарвуз экиб, ҳосилини йиғиб олгач, июль ойида карам ва лавлаги, пиёз эккан.
Япония ва Швейцария, шунингдек, Туркиядан олиб келинган замонавий технологиядан фойдаланган деҳқонлар қимматбаҳо уруғ навини экиб, томчилатиб суғориш усулини қўллашган. Натижада яхши ҳосил етилган. Хўжаликнинг фаолияти билан танишган вилоят ҳокими келгусида ҳар бир қишлоқда мана шу икки марта ҳосил олиш усулини қўллашни топширди.
Таъкидлаб ўтиш жоизки, 2012 йили ташкил этилган хўжаликнинг қарамоғида умумий майдон 286,0 гектар. Бу ерда 20 одам ишлайди. Уларнинг ўртача маоши 80 минг тенге. Келгусида “Турар” деҳқон хўжалигига 14,3 млрд. тенге сармоя жалб этилади. Натижада тадбиркор юзлаб ҳамқишлоқларини доимий иш билан таъминлашни мўлжалламоқда. Керакли маблағни Европа қайта қуриш ва Тараққиёт банки ажратмоқчи.
–Топшириқнинг пухта бажарилганини кўриб турибман. Бироқ бу биргина деҳқон хўжалиги бажарган иш. Маҳсулот сифати ҳам кўзга ташланиб турибди. Худди шу бир йилда 2-3 марта ҳосил олиш ҳадисини барча қишлоқ округларида жорий этиш лозим. Ўрганиб, янада ривожлантириш керак, – деди минтақа раҳбари.
Вилоят ҳокими бундан сўнг Чордара туманида юқори босимли газ қувури ва “Отеғул” кичик туманидаги ўрта босимли газ қувурини ётқизиш ишлари билан танишди. Режа бўйича туманда 2023 йилнинг 31 декабригача 80 мингга яқин аҳолисига эга 22та қишлоқ “зангори олов” билан таъминланади. Бу 99,45 фоизни ташкил этади.
Минтақа раҳбари шаҳар сув тизими фаолияти билан ҳам танишди. 1983 йили ишга туширилган сув тизими бугунги кунда 5990та уй, яъни 5457та истеъмолчига хизмат кўрсатади.
Шундан сўнг вилоят раҳбари “Шардара Армспорт” спорт клубига бориб, таниқли спортчилар билан учрашди. Жаҳон чемпионлари хиёбони ва таэквондо, каратэ, енгил атлетика залларининг очилиш маросимида иштирок этди.
Хизмат сафари чоғида вилоят ҳокими “Уй-жой жамғармасини янгилаш” дастури доирасида Чордара шаҳрида кўп қаватли уйларни капитал таъмирлаш ишлари билан ҳам танишди. Таъкидлаш жоизки, 1970 йили қурилган тўрт қаватли уйда 40та квартира бор. Бугунги кунда 180та одам яшайдиган уйни тўкис таъмирлашни бош пудратчи “Монолит Строй ХХI” компанияси олиб бормоқда.
Сафари якунида вилоят ҳокими туман марказидаги индустриявий минтақада жойлашган “Ай-қажы Ақ Алтын” МЧБнинг пахтани қайта ишлаш заводи фаолияти билан ҳам танишди. 2018 йили очилган корхона йилига 20 минг тонна пахта хомашёсини қайта ишлайди. Бугунги кунда заводда 125 киши меҳнат қилади, уларнинг ўртача маоши 70 минг тенгени ташкил этмоқда. Келажакда корхонани кенгайтириш орқали янги иш ўринлари ташкил этилиб, пахтани қайта ишлаш ишлари яхшироқ йўлга қўйилади.
***
Туркистон вилояти ҳокими Ўмирзақ Шўкеев Мақтаарал туманига иш сафари чоғида “Отан Ана” деҳқон хўжалиги фаолияти билан танишди.
Бу ердаги деҳқонлар беда, маккажўхори, тарвуз ва бошқа сабзавотлар етиштириш билан шуғулланади. Хўжалик 73,9 гектар майдонда деҳқончилик қилади. Сўнгги йилларда томчилатиб суғориш усулини қўлламоқда. Натижада даромад ҳам ортиб келади. Келгусида хўжалик йилига 3 марта ҳосил йиғиб олишни режалаштирмоқда.
– Даромаднинг ўсгани яхши. Бироқ маҳсулот ҳажмини орттириш билан бирга, омборларни ҳам режалаштириш, улар сонини кўпайтириш лозим, – деди Ўмирзақ Шўкеев хўжалик соҳибларига.
Жорий йилнинг август ойидаги маълумотга кўра, Мақтаарал тумани қишлоқ хўжалиги соҳасида етиштирилган маҳсулотнинг ҳажми 8028 млн. тенгени ташкил этган. Вилоят раҳбари туманни ривожлантириш юзасидан амалга оширилаётган лойиҳаларнинг бажарилишини ҳам текширди. Кўкамзорлаштириш ва ободонлаштириш ишлари ҳам диққат марказида. Мирзакентдаги марказий, “Шуҳрат” хиёбонларида янгилаш ишлари жадал олиб борилмоқда. Марказий Маданият уйи капитал таъмирдан ўтказилмоқда.
Ўмирзақ Естайули қурилиш ишлари чоғида канализация ва газ қувурларини ўтказиб кетишнинг муҳимлигини таъкидлади. Сўнг минтақа раҳбари пахта ташишга мўлжалланган “2ПТСХ-10-45” русумли трактор тележкасини ишлаб чиқариш заводида бўлди. Корхонада автотураргоҳ, маъмурий бино, тарози ва омбор, техник хизмат кўрсатиш маркази ва эҳтиёт қисмлар омбори мавжуд.