* Президент топшириқлари – ҳаётга! 

Маълумки, ҚР Президенти Қ. Тўқаев бу йилги Мактубида маданият ходимларини қўллашга алоҳида тўхталди. 

“Биз маданият соҳасида ишлайдиган фуқароларга етарли эътибор бермаяпмиз. Бу – аввало, кутубхона, музей, театр ходимларига тегишли масала. Уларнинг маоши кейинги  йилларда умуман ошгани йўқ. Шу сабабли маданият ходимлари, айниқса, ёш мутахассислар имтиёзли уй-жой дастурларида қатнаша олмаяпти. Бундай аҳвол бу касб обрўсини тушириб, муносиб кадрларнинг танқислиги ошкора сезилмоқда. Келаси йилдан бошлаб Ҳукумат маданият ходимларининг иш ҳақини кўпайтириши керак. Шунингдек, таълим ва соғликни сақлаш соҳаларидаги мажбурий ижтимоий имтиёзлар маданият соҳаси вакилларига ҳам берилиши лозим”, – дейилади унда.

Шу билан бир қаторда Президент оммавий спортни ривожлантириш заруратини ҳам қайд этади: 

“Миллат саломатлигини мустаҳкамлаш масалалари алоҳида эътибор талаб этади. Аҳолининг барча ёш гуруҳлари ўртасида оммавий спортни ривожлантириш муҳимдир. Болалар учун спорт инфратузилмасининг имкон қадар оммабоплигини таъминлаш даркор. 

Ушбу йўлни қонун жиҳатидан таъминлаш, шунингдек, Оммавий спортни ривожлантириш мажмуавий режасини қабул қилиш лозим”.

Президентнинг юқоридаги талабларини бажариш йўлида соҳа вазири Ақтўти Райимқулова 2025 йилга бориб, Қозоғистонда оммавий спорт билан шуғулланадиганлар  сони 35 фоизга ортишини маълум қилди. Ўтган йил натижаларига кўра мамлакатда  5,5 млн.дан зиёд фуқаро мунтазам равишда спорт билан шуғулланган, яъни фоизга чаққанда 29,8 фоиз. 

Дарвоқе, вазирнинг айтишича, Президент топшириқларини бажариш маданият ва спорт соҳаси ходимларининг ижтимоий шарт-шароитларини яхшилашга ёрдам беради. 

Маданият ва спорт вазирлиги ўз тарафидан маданият ва санъат соҳаси ходимларининг иш ҳақини кўпайтиришга оид тегишли Қоидаларни ишлаб чиқиб, Ҳукуматга топшириб қўйди. Улар йил охирида қабул қилинади. Маданият соҳасида машғул одам сифатида  ушбу масаланинг ҳал этилишини интизорлик билан кутаётганларни жуда яхши тушунаман, – деди у.

Демак, ушбу меъёр қабул қилинса, янги йилдан эътиборан маданият соҳаси ходимларининг моддий аҳволи яхшиланишига умид бор.