Арис шаҳрини тиклаш ишларида қатнашган ишчилар ишларини тугатиб, уйларига қайтишмоқда

Арис шаҳрини тиклаш ишларида қатнашган бир қанча мавзе қурувчилари  ишларини тугатиб, уйларига қайтишмоқда. Бу мавзеларнинг барчасида  тўкис таъмирлаш  ишлари тўлиқ тугади.  Бу кеча Арисда ўтган девон йиғилишида айтилди. 

Туркистон вилояти ҳокими Ўмирзақ Шўкеев раислигида ўтган йиғилишда Арисда амалга оширилган ишлар, йўл, инфратузилма ва ҳужжатлаштириш масаласидаги сўнгги маълумотлар тилга олинди. Портлашдан 8 мингдан зиёд уйнинг 7634таси зарар кўрган бўлса, улардан 500га яқини мутлақо яроқсиз ҳолга келган. Шунингдек, тўлиқ қайта тикланган иншоотлар рўйхатида кўпқаватли учта уй бор. Айни пайтда бу уйларнинг ҳам қурилиши тугатилиб, ички пардозлаш ишлари юритилмоқда. Мазкур ишларга вилоятда 3 мингга яқин киши жалб этилди. 

–Уч ойда тўлиқ янгиланган Арис шаҳрида олиб борилган иш барчамиз учун мисли кўрилмаган, бебаҳо  тажриба бўлди. Қисқа вақт ичида шаҳарни қайтадан  тиклаш  – тарихда бўлмаган. Бу мамлакатимиздаги бирлик ва тотувликни кўрсатади. Бундай ҳолат энди ҳеч бошимизга тушмасин, – деди вилоят ҳокими.

Мажлисда Туркистон шаҳри ҳокими Рашид Аюпов кўҳна шаҳардаги қурилиш ишлари ҳақидла ахборот берди. Бугунги кунда вилоят маркази 16та мавзега бўлиниб, уларга вилоят бошқармалари ва туман-шаҳарлари, шаҳар ҳокимлиги бўлимлари масъул этиб тасдиқланган. Ҳокимнинг айтишича, барча ҳудудларда ишлар жадал юритилмоқда. 

Шу ўринда Ўмирзақ Шўкеев шаҳар раҳбарига халқ билан ишлаб, тозалик ва тартибни назорат остига олишни топширди. Туркистон шаҳрини кўкаламзорлаштириш ишини назорат қилишни вилоят ҳокими ўринбосари Улан Тажибаевга юклади. Бундан буён Туркистонда намунали кўча, ҳовлилар аниқланиб, пешқадамлар рағбатлантириладиган бўлди.