Журналистлар орасида ўтаётган анъанавий спартакиаданинг тўртинчи куни алоқа ва ахборот воситалари ходимлари стол тенниси ва боулинг ўйинларида омадини синашди. Матбуотчилар мазкур спорт турларини яхши эгаллаганликларини намойиш этишди. 

“Уақыт” газетаси уюштирган стол тенниси мусобақасида мухбирларимиз Мунаввархон Фарҳодова барча рақибларини доғда қолдириб, чемпионликни қўлга киритса, Малика Элтоева бронза медалига эгалик қилди. Иккинчи ўрин “Оңтүстік Қазақстан” газетаси мухбири Баян Дарғўжинага насиб этди. Йигитлар орасида биринчи ўринни “Южный Казахстан” газетаси ходими Н. Мамиқов қўлга киритди, “Ернұр” корпорацияси вакили С. Ибрагимов – иккинчи, “Қазақстан-Шымкент” вакили 

Ў. Жўлдасбеков учинчи ўринни эгалладилар.

Боулинг мусобақасини “Қазақстан-Шымкент” телеканали уюштириб, унга “Мадлен”, “Бал-текстиль”, “Роял клуб” ва “Сапал Стандарт” компаниялари ҳомийлик қилди. 

Эркаклар орасида ўтган баҳсда “Ана тілі”газетасининг вилоятимиздаги махсус мухбири Нуршат Тўкен олтин медалга сазовор бўлди. “Жебе” босмахонаси ходими Асилбек Туйетаев – иккинчи, “Ернұр” корпорацияси вакили 

Т. Қулимбетов учинчи ўринни эгаллашди. Аёллар орасида эса “КТК” телеканалининг вилоятимиздаги махсус мухбири М. Низовкина – биринчи бўлди, “Қазақстан-Шымкент” телеканали ходимаси 

П. Биназар қизи – иккинчи, “Жебе” босмахонаси ходимаси Г. Байдаулетова учинчи ўрин билан кифояландилар.