“Қозоғистон темирйўли МК” ҲЖ раиси Сауат Минбаев Туркистон вилояти ҳокими Ўмирзақ Шўкеев билан бирга Арис шаҳрининг муҳим объектларидан бири – темирйўл вокзалида бўлди, Арис темирйўл станциясидаги транспорт инфра­­­­­тузилмаси иншоотларини аслига келтириш ишлари билан танишди.

Таъкидлаш жоизки, бу ердаги барча ишлар белгиланган муддатда тугатилган. Портлаш оқибатида темирйўл станцияси атрофида жойлашган 60дан зиёд хизмат-техника биноси, уй-жойлар зарарланган эди. Қисқа вақтда тарихий темирйўл вокзали тўлиқ таъмирланиб, янги қиёфа касб этди. 

Шаҳардаги тарихий ва муҳим аҳамиятга эга мураккаб қурилишни “Самруқ-Қазина” миллий фаровонлик жамғармаси амалга оширди. Арис – Марказий Осиё дарвозаси, тўрт томондан келадиган йўллар туташган темирйўлчилар шаҳарчасидир. Бу ердаги аҳолининг аксарият қисми шу соҳада меҳнат қилади. 

Жорий йилда Арис шаҳридаги 1-темирйўл вокзали қурилганига 115 йил бўлади. Олиб борилган ишлар натижасида пойдевори 1904 йилда қўйилган тарихий бинонинг ички ва ташқи қисми бутунлай янгиланди. Энг асосийси, бинонинг тарихий қиёфаси сақлаб қолинди. У келажак авлодга очиқ музей вазифасини ўтаб, мозийдан садо бериб туради.