Туркистон шаҳри янги истироҳат боғи билан бойиди. Шаҳардаги Есимхан майдонида “Гуллар” истироҳат боғи куни кеча тантанали равишда очилди. Унда вилоят ҳокими Ў. Шўкеев ҳамда шаҳар ҳокими Р. Аюпов иштирок этдилар. 

Ушбу дам олиш маскани “Туркістан жарық-тазалық” МЧБ лойиҳаси туфайли юзага келди.  Ободонлаштириш ишларига икки ойдан зиёд вақт сарфланди. У ерда 35 метрли фаввора, 10та катта ва 72та кичик чироқ, “хоббитлар уйи” ва ҳоказолар бор.

Келаси баҳорда бу маскан янада кўркамлашади, сабаби, турли гул кўчатлари ўтқазилади.

Туркистонда истироҳат боғлари кўпаймоқда. Улар бир-бирини такрорламайдиган, ўзига хос хусусиятларга эга бўлади. Яқин келажакда қурилиш ишлари жадал суръатлар билан давом этаётган Ўтрор кичик туманидаги маъмурий-тадбиркорлик марказида янги майдон фойдаланишга топширилади. Йил охиригача  Туркистонда “Ғалаба” истироҳат боғи ҳамда кичик хиёбон ишга туширилади. Шунингдек, шаҳар чеккасида барпо этилаётган саккизта хиёбон ҳам шаҳар кўркига кўрк қўшиши кутилмоқда.