“Nur Otan” партияси филиалининг Туркистон вилояти жамоатчилик қабулхонасида вилоят маслаҳати депутати Зуппархон Чолдонов фуқароларни шикоят ва илтимослари бўйича қабул қилди. 

Бўстонлиқ қишлоғидан  келган Гулнора Ибодуллаеванинг Ўранғай қишлоғига 150 ўринли янги мактаб қурилиши ҳақидаги таклифини тинглаган маслаҳат депутати  бино сметаси тайёрлиги, келаси йили бюджетдан маблағ ажратилиб, тендер эълон қилинишини айтди. Шунингдек, “Ўттиз йиллик” аҳоли манзилидан келган Алишер Абдукаримов қурилиши бошланган иншоотга қўшимча маблағ ажратилишига кўмаклашишни илтимос қилди.  Бугунги кунда қурилиши 98 фоиз битган янги мактабни З. Субат ўғли ўз назорати остига олишини, декабрь ойигача  тегишли бошқармалар билан иш олиб бориб, масалани ҳал қилишини таъкидлади. 

Жамоат қабулига келган Хуршид Шаропов  Эски Иқон қишлоғи Маданият уйида иситиш тизимининг йўқлигини, ходимларнинг қиш ойларида ишлаши қийинлигини билдирди.   Маданият уйи директори кўтарган масала бир неча йиллардан буён долзарб бўлиб келаётганини инобатга олган маслаҳат депутати  тегишли маҳкамаларга мурожаат қилиб, смета тайёрлаш, қанча маблағ кетишини ҳисоблаб, ёрдамлашишини маълум қилди. 

 Д. Эшбоева ва  З. Абдуғаниевалар эса манзилли ижтимоий ёрдам ололмаганларидан шикоят қилишди. Бу масала тегишли ташкилотга йўлланди. 

– Бугунги жамоат қабули вилоятимиздаги қатор долзарб масалаларнинг ҳал этилишига сабаб бўлди. Жойлардаги деҳқончилик, ёритиш ва иситиш тизимлари, уй- жой ва мактаблар қурилиши, шунингдек, ПУИД-2 лойиҳаси асосида  қазилаётган ариқларни битказиш каби масалалар назоратга олинади, – деди вилоят маслаҳати депутати З. Чолдонов.