Бир куни уйда майда-чуйда ишлар билан куймаланиб ўтирсам, бехосдан эшик тақиллаб қолди. Очсам, қўшни хотин, қўлида тўрт-беш дона шам. Қўни-қўшнидан бирор уй-рўзғор буюми ёки бошқа керакли нарса сўрамаган бу бадавлат қўшни аёлнинг вақт хуфтонга яқинлашиб қолганида: “Қўшни, икки дона шамингиз йўқми?”– дея илтимос билан келгани менинг ҳайратимни оширди.
Тўғриси, электр чироқлари куну тун беминнат хизмат қилиб турган ҳозирги замонда ким ҳам қўша-қўшалаб уйида шам жамлаб қўяди? Қачонлардир ишлатилган яримта шамни стол тортмасидан олиб, узатдим. Олмади. “Бунақаси кўп, бошқа қўшниларда ҳам бор”. Опага ишлатилмаган, гугурт олови тегмаган яп-янги шамлар лозим экан. Сабабини суриштириш ноқулай бўлди, албатта. Аммо аёл киши кўзларимдан: “Нима қилар экан, буларни?”– деган ҳайратланарли саволни уқиб олди чамаси, дарҳол изоҳ беришга киришди.
Маълум бўлишича, эртага опанинг яқиндагина биринчи синфга борган ўғлининг туғилган куни экан. Ўғли етти ёшга киради. Мактабда эса икки кун олдин бир хотин қизининг туғилган кунини нишонлаб, катта торт устига еттита шам ёқибди. Етти ёшга етган қиз бир пуфлашда уларни ўчирибди. Ҳамма қийқириб, қарсак чалибди. Ғаройиб, одатда телевизордаги қандайдир ажнабий фильмларда кўрсатиладиган бу воқеага опанинг ўғли гувоҳ бўлибди. Синфда ўқиётган қолган йигирма беш ўқувчи ҳам устозлари билан бирга шу манзара ва тантана иштирокчиси экан.
Опа нима қилмоқчи? “Чиллаки чиллакини кўриб, чумак урибди” деганларидек, опа айни “анъана”ни давом эттирмоқчи экан. Яъни, икки киши бир амаллаб кўтарадиган катта тортни аллақачон тайёрлатиб, унинг ўртасига дил сўзларини ҳам битиб қўйган. Аммо, унинг айтишича, етти ёшга кирганлик рамзи саналмиш ўша тантанада ёқиб ўчирилиши лозим бўлган етти дона шамни олдиндан ҳозирлаб қўйиш хаёлидан кўтарилибди. Ана энди кечқурун уйма-уй юриб, эшик тақиллатиб, қўшнилардан бирма-бир шам суриштириб юрган экан.
Тўғриси, қўшни хотиннинг икки дона қўшимча шамнинг топган-топмаганини ёки мактабда ўша тантанани қай йўсинда ўтказган-ўтказмаганини билмадиму, бироқ хаёлимда бир дунё саволлар кезди. Биз қай томонга қараб кетмоқчимиз? Маърифат-маънавият маркази бўлмиш мактаб, унинг азиз устозлари ўзлари қилаётган амалларининг моҳиятини тушунадиларми? Мактабларда уюштириладиган бундай кўнгилочар анжуманларда қандай тарбиявий қиймат бор? Бу бизга қачондан урф бўлган? Кимдан ўтди? Телевизорда кўрсатилган ажнабий сериаллар орқали бизнинг маданиятимизга ўтиб қолаётган бундай касалликларни ким даволайди? Нега шам ёқадилар? Бунинг туб моҳиятида қандай маъно бор?
Шу саволлар ғалаёнида беихтиёр “Шум бола”даги бир эпизодни эсладим. “Ундан кейин”чи бойнинг: ”Қўрғонга қаердан ўт кетибди?” – деган саволига шум бола: “Шағамдан ўт кетибди, шағамдан”, дейди. Бой давом этади:
– Ҳой, ўзинг жинни бўлиб қолибсан, ўғлим! Ахир менинг даргоҳимда шамга кун қолибдими? Қатор-қатор лампалар, ўзим Тошканддан атай сотиб олиб келган қирқинчи фонарлар қаёққа кетибди, керосинни бўлса, бир йилга етарлигини бочка-бочка запас қилиб қўйган эдим. Нимага шам ёқасанлар. Нимага шам ёқасанлар?
– Хўжайин, дейман, ўзингиз ҳам одамни жуда хит қилиб юборар экансизда? Бутун бошлиқ ўликнинг арвоҳига шам ёқмай, лампа ёқиладими? Ахир косага сув қўйиб, устига олма шохи қўйилади. Келган арвоҳ аввал шохга қўниб ўтиради. Бир нафас дамини ростлагандан кейин ҳалиги шағамнинг пирпираб турган шуъласи билан ўйнашади”.
Адибнинг нияти, шумлик воқеасининг давоми сизга маълум. Буни қарангки, ўтган аср аввалида марҳумнинг арвоҳи учун шам ёқилган бўлса, ХХI аср аввалида тирик одамнинг бир ёшга улғайгани рамзи сифатида шам ёқилибди. Тараққиёт ўлик ва тирик орасида. Шам эса ўз ҳолича. Аммо фикри очиқ, назари ўткир, қалби имон ва миллий одатларимиз нури билан чароғон кимса ҳар икки ҳолатдаги шам ёқишлар ўликларга ҳам, тирикларга ҳам асло наф бермайдиган хурофот эканинини дарҳол англайди.
Мозор бошига бориб, ўликнинг арвоҳи учун шам ёқиш нақадар бемаънилик бўлса, кейинги вақтда орттириб олинган “янги одат” бемаънилик устига беъманиликдир.
Назаримда, энди-энди урчиб бораётган бу маънавий касалликнинг урфга айланмаслиги, ўқувчи болаларнинг мурғак дунёқарашини эгаллаб олмаслиги учун жамиятнинг ҳар бир аъзоси масъулдир. Шам ёқишнинг эътиқодий жиҳатдан мусулмонларга ҳеч қандай фойдаси йўқ. Зотан, Исломгача бўлган ботил эътиқод эгалари оташ-оловга топинганлар, оловни “илоҳий”лаштирганлар. Бу одат халқ орасида ўша оташпарастлик қолдиғи сифатида яшаб келган. Билиб-билмай қилинаётган амалларнинг маънавий негизида юзага келадиган ўпирилишлар миллий-исломий урф-одатларимизга мутлақо бегонадир. Хавф ҳам шунда.