ҚР Таълим ва фан вазири Асхат Аймағанбетов 2020 йилда муаллимларнинг маоши 25 фоизга ошишини маълум қилди.

– Давлат раҳбарининг август анжуманида берган топшириғи доирасида келгуси 4 йилда ўқитувчиларнинг ойлиги икки бараварга ошади. Бу келаси йилдан бошлаб уларнинг ойлиги 25 фоизга кўпаяди, деган сўз. Албатта, бу масала  педагогларни  бироз хавотирга ҳам солмоқда.

Ойлик кўтарилганда базавий лавозим мао­шигина ошар экан, деган фикрлар айтил­моқда. Шунинг учун бу масала Президентнинг бизга бер­ган топшириғига кўра, умуман ўқитувчининг ой­лигига тегишли бўлади ва январь ойидан иш бош­ланади, – деди ҚР Парламенти Мажлисининг умумий йиғилишида “Педагог мақоми тўғрисида” Қонуни лойиҳаси билан таништирган вазир.

Унинг айтишича, қонун лойиҳасида синф раҳбарлиги ва дафтар текширгани учун педагог­ларга икки ҳисса кўп қўшимча ҳақ тўлаш кўзда тутилган. Бу меъёр элимиз бўйича 182 минг синф раҳбари ҳамда дафтар текширгани учун устама ҳақ оладиган 165 минг ўқитувчига те­гишли.

– Шунингдек, барча педагоглар учун таътил муддатини 56 кунга узайтириш кўзда тутил­моқда. Бу меъёр бугунги кунда 110 минг ҳамкас­бимизга тегишли. Ҳозиргача улар 42 кун дам олиб келса, энди 56 кун меҳнат таътилида бў­лади, – деди у.

А. Аймағамбетовнинг таъкидлашича,  мураб­бийлик учун педагогларга йил бўйи 17 минг тенге қўшимча ҳақ бериш ҳам таклиф қилинмоқда.  Магистр унвонига эга устозлар сони бўйича биз бошқа давлатлардан жуда орқадамиз. Шу боис бу масалани ҳам ҳал этамиз. Агар магистр унвонига эга педагог мактабга келиб ишласа, уларга ОҲКнинг 10 баравари миқдорида қўшимча ҳақ тўланади, – деди вазир.