Жорий йилнинг 10 ойида қозоғистонликлар тўлов карталари орқали 24,1 трлн. тенгега 1,2 млрд. операцияни амалга оширган. Натижада нақд пулсиз кўрсатилган хизматлар ҳажми 2018 йилгидан 52 фоизга кўтарилган.

Нақд пулсиз хизматларнинг асосий қисми мобил банкинг ва POS-терминаллар орқали бажарилган. Уларнинг ўртача чеки 20 минг атрофида.

Бугунги кунда қозоғистонликларнинг қўлида 31,2 млн. дона тўлов карточкаси бор. Уларни 22та банк ва “Қазпошта” ҲЖ чиқаради. Аҳоли орасида VISA International ва MasterCard Worldwide халқаро тўлов тизимларининг карталари ҳам кенг тарқалган. UnionPay International, American Eхpress International ҳамда Dintrs Club International карталарига талаб уларга нисбатан бирмунча кам. Мамлакат иккинчи даражали банклари ҳам Altyn Cаrd (“Қозоғистон Халқ Банки” ҲЖ), Ситибанк (“Ситибанк Қозоғистон” ҲЖ) ҳамда Kaspi.kz (“Kaspi Bank” ҲЖ) каби маҳаллий тизимларнинг тўлов карточкаларини чиқаради. 

Сўнгги 10 йилда тўлов карточкаларининг сони йил сайин ўрта ҳисобда 20,3 фоизга, ундан фойдаланувчилар сони 17,7 фоизга ортиб бормоқда. 2015 ва 2016 йилларнинг ўзидагина дунёвий иқтисодий инқирознинг салқини қаттиқ сезилган пайтда карточкадан фойдаланувчилар қатори озайгани сезилган.