Сиз адашмадингиз, айнан сифатсиз маҳсулотлар ҳақида тегишли ташкилотга хабар берсангиз, тақдирланасиз! ҚР Соғликни сақлаш вазирлигининг рақамлаштириш идораси Қозоғистоннинг Wipon IT компанияси билан ҳамкорликда сифатсиз товар ва маҳсулотларга қарши шу тарзда “кураш” эълон қилди.

Сифатсиз товар-маҳсулотларни аниқлаш учун мамлакатдаги барча қозоғистонлик савдо дўконларини оралаб чиқиш шарт эмас, ўзингиз билган дўкончадаги эҳтиёж моллари орасида сифатсизини учратсангиз, интернетга уланган смартфонингизда расмини олсангиз, кифоя. Бунинг учун уяли телефонингизга бепул Wipon for consumers (Android ва IOS истеъмолчилари учун) иловасини юклаб олинг, шунда товарларнинг штрих-кодларини сканердан ўтказиш имконига эга бўласиз.

Дарвоқе, истеъмолчи шу йўл билан маҳсулотнинг номи, фойдаланиш муддати, партия ва серия рақамлари, тайёрланган вақти, ишлаб чиқарувчи ёки етказиб берувчи ва маҳсулот сараланадиган жой ҳақидаги маълумотларга эга бўлади.

Агар истеъмолчи номақбул маҳсулотни аниқлайдиган бўлса, унга мукофот берилади. 

Шуни эслатиб ўтиш жоизки, инсон саломатлиги ва хавфсизлигига зарар етказадиган озиқ-овқат маҳсулотлари рўйхати ҚР Соғликни сақлаш вазирлигининг Сифат ва хавфсизликни назорат қилиш қўмитаси томонидан тайёрланиб, эълон қилинган.