Ҳафта туман фаолларининг ишни пухталашга оид мажлиси билан бошланди. Туман ҳокими Уласбек Садибеков раислигида ўтган йиғинда “Ғамхўрлик” дастури доирасида ёрдамга муҳтож 111 оила аниқлангани маълум бўлди.

Буни туман ҳокими ўринбосари Ержигит Шарипбеков маълум қилди. Маърузачининг бажарилган ишлар ҳақидаги ҳисоботини тинглаган У. Садибеков вазифалар юз фоиз бажарлиши лозимлигини таъкидлади.

Е. Шарипбеков манзилли ижтимоий ёрдамга ҳужжат топширганлар бўйича сўнгги маълумотларни ўқиб эшиттирди. Шунингдек, Манкент қишлоқ округида аҳолини тоза ичимли сув билан таъминлаш ишлари 99 фоизга бажарилгани айтилди.

Мажлисда қишлоқ хўжалигига мўлжалланган ер участкаларини электрон харитага киритиш масаласи ҳам кўрилди. Туман ҳокимининг мазкур соҳага масъул ўринбосари Баҳодир Ўлжаевнинг айтишича, режа 46,6 фоизга бажарилган.

1 мартгача Сайрам туманида кўргазмали қуроллар, афиша-эълонларни тартибга келтириш ишлари юритилади. Шунингдек, туман, қишлоқ кўчаларидаги 40дан зиёд LED экрани тўлиқ ишга туширилиб, баннер, билбордларда 2020 йилда мамлакатимизда эътибор қаратилаётган муҳим масалалар акс эттирилади. 

Туман ҳокимининг мазкур соҳага масъул ўринбосари Мадияр Ўразалиев соҳада олиб борилаётган ишлар ҳақида маълумот берди.