АҚШ сармоядорлари мисли кўрилмаган лойиҳани вилоятимизда амалга оширади

Вилоят ҳокими Ўмирзақ Шўкеев Америка Қўшма Штатларининг “Lindsay” компанияси вакиллари билан учрашди. 

Унда вилоятимизнинг деҳқончилик ва чорвачилик соҳаларини ривожлантириш масалалари муҳокама қилинди. Жаҳонда юқори сифатли технологиялари билан машҳур бўлган нуфузли компания самарали лойиҳаларни таклиф қилган эди. Ана шулардан бири – “Turkestan agro.kz” компанияси билан ҳамкорликда Арис шаҳрида 4 минг гектар майдонда ёмғирлатиб суғориш услубини татбиқ қилиб, мол озуқаси етиштиришни йўлга қўяди.

Америкалик сармоядорларни минтақа иқлимининг деҳқончилик учун қулайлиги қизиқтирмоқда. Хорижлик йирик компания эгалари ички бозорни тўлдириш баробарида ўз маҳсулотларини экспортга чиқариб, вилоятнинг иқтисодини юксалтиришга ҳисса қўшишни кўзлайди. 

Арисга назари тушган АҚШ сармоядорларининг илғор технологияси масофадан бошқарилиб, сув, электр энергиясини ўта кам сарфлайди. Қўшма лойиҳа ёмғирлатиб суғориш ускуналарини ўрнатиш ва қўлланиладиган инфратузилмани такомиллаштириш ишларидан бошланади. Хориж компанияси бу ишлардан ташқари чорвачилик соҳасини ривожлантиришга ҳам бел боғлаган. Аниқроқ қилиб айтганда, улар 20000 бош қорамолга мўлжалланган бўрдоқилаш майдонини ҳам қуради. Арпа ва маккажўхори экиб, озуқабоп ем-хашак ишлаб чиқаради.

Ўмирзақ Естайули икки томонга ҳам фойдали, шунингдек, ҳудуд иқтисодиёти учун зарур бўлган лойиҳани ҳокимлик астойдил қўллаб-қувватлашини таъкидлади ва мамлакатимизда тенги йўқ лойиҳанинг бошқа ҳудудларда ҳам йўлга қўйилиши кераклигига урғу берди.